Read gitonga Jobu 40 Bible Online

Jobu 40 - gitonga bible

Jobu 40

¹Ndipo Ambuya anguti kwaku Jobu:

²“Kumbi wakusaniya chifukwa wakapindananga ndi Wanthazi zose? Yo wasuskana ndi Chiuta, wamuke.”

³Viyo Jobu wangwamuka Ambuya wanguti:

⁴“Wonani, ndawambura vinjeru ine; nchine cho nkhakumukaninga? Ndipo waka pa mlomo wangu ndi janja langu.

⁵Ndakamba kamoza, ndipo kuti nkhamukanga cha; kaŵi, kweni kuti nkharutiriyanga so cha.”

⁶Ndipo Ambuya angwamuka Jobu kutuliya mu kavuruvuru, kuti:

⁷“Vwara-zikho mu chiwunu chako nge ndi munthurumi, nkhakufumbanga, ndipo ukandikonkhoskiyanga.

⁸Kumbi ukatinge ndabuda; kumbi ukandisuskanga kuti nde muheni, mwakuti ujirunjiske?

⁹Kumbi wendi janja nge ndi Chiuta, ndipo kumbi ungaziŵa kuguluruska ndi mazu ghako nge ngake?

¹⁰“Ujitoweske sono ndi ukuru wako ndiso ulemu wako, ujivwarike unkhankhu ndi utozi.

¹¹Punguwa kandundu ka ukari wako, ndipo lereska paku yose yo ngwakujikuzga, ndipo muyuyuwe.

¹²Lereska paku yose yo ngwakujikuzga ndipo mususkiye pasi, phwatiya pasi ŵaheni mu malo gho ŵatuma;

¹³ŵabise wose pamoza mu fuvu; manga visku vyawo pasi pa charu.

¹⁴Viyo nani so nkhaziŵiskanga, kuti janja lako lamarghe lingaziŵa kukupundiska.

¹⁵“Wona, Boko yo ndingulenga nge ndimo ndingulenge iwe, waturgha uteka nge ndi ng'ombe.

¹⁶Wona, nthazi zake mu chiwunu chake ndi kulimba kwake ko kwe mu minofu yamu chifuŵa chake.

¹⁷Wanonopeska gwa muchiya wake nge ndi muti wa mlanji, misempha ya vigha vyake yikulungana pamoza.

¹⁸Viwanga vyake vye nge ndi vipitika vya mkuŵa, viŵaro vyake viyana nge ndi mizati ya chisulo.

¹⁹“Ndiyo wakudanga wanchitu zaku Chiuta; mweniyo wakumulenga ndiyo wazi pafupi ndi lipanga lake!

²⁰Mapiri ghatimurongosore vyakurgha kweniko vinyama vyose vyamu dondo visoŵe.

²¹Wagona pasi mu miduzi ya miti ya lotusi, mukati mwa mateti mu viyaghayagha.

²²Miduzi ya miti ya lotusi yitumubenekere, miti yamu msinji yitumuzingiriya.

²³Woma, asani maji ghamu msinji ghazaza kuti iyo watopa cha, nanga Yordane wangazaza maji kufika mpaka, pa mlomo wake, kweni kuti waghanaghanako cha.

²⁴Kumbi yumoza wangamuŵeja ndi mbeja, pamwenga kutoro mphuno ndi mtazi?