Read gitonga Jobu 6 Bible Online

Jobu 6 - gitonga bible

Jobu 6

¹Viyo Jobu wangumuka:

²“Mphanyi suzgu yangu yapimika, ndi soka langu lose, mphanyi lapimika pa mweso!

³Pakuti mphanyi vyazita kuruska mchenga wapa nyanja; chifukwa ichi mazu ghangu ghaneneka ruŵiruŵi.

⁴Pakuti mivwi ya Wanthazi zose ye mwaku ine. Mzimu wangu utumwa ulembe waku yo. Vyakofya vyaku Chiuta vinozgeka kumikana nani.

⁵Kumbi boli waliya asani we ndi uteka? Pamwenga, kumbi Ng'ombe yibama pa vyakurgha vyake?

⁶Kumbi cho nchambura kunowa chingarghika chambura mche, pamwenga kumbi zira lituŵa la mukati linowa?

⁷Ndilive chirghoko chakuvikole, vyenge vyakurgha vyambura kukhumbikwa kwaku ine.

⁸“Owe! Mphanyi ndinguŵa nacho chakuromba kuti Chiuta wandipaske cho ndinweka;

⁹kuti chimukondwereske Chiuta, kundiphwanya, kuti watambaruwe janja lake lindidumuwe!

¹⁰Ili ndilo latinge liŵenge likondwa langu, nadidi ndatinge ndikondwenge mu urwirwi wambura kulekezga, chifukwa ndilivi kukana mazu gha Mtuŵa.

¹¹Kumbi nthazi zangu zine kuti ndizilindizge? Ndipo umari wangu ngune kuti ndije chisisi?

¹²Kumbi nthazi zangu ndi nthazi za mya, pamwenga, kumbi liŵavu langu ndi mkuŵa?

¹³Kwakuneneska, ndilive cho vyo mwaku ine, chovyo chose chituwamo mwaku ine.

¹⁴“Yo wakana kuchitikiya ulemu ndi mubwezi wake, wareka kopa Wanthazi-zose.

¹⁵Ŵabali ŵangu ŵandinyenga nge nkhamsisi ka maji, nge ndi maji ghakwenda,

¹⁶ghenigho ghafipiskika ndi nyankhuŵinda, ndipo mwenimo nyankhuŵinda wabisama.

¹⁷Pa nyengo yakufunda viparghang'ika ndi penipo kwafunda vizirimitiya pa malo ghawo.

¹⁸Ŵapu ulendo ŵapatuka, mu nthowa zawo; ŵakwere kunyake, ndi ŵamara wose.

¹⁹Ŵapa ulendo ŵaku Tema ŵawona, ŵapa lwendo ŵaku Sheba ŵarindizga.

²⁰Ŵafipa mtima chifukwa ŵangugomezga, ŵangufikako ndipo ŵangutimbanizgika.

²¹Kwaku ine, imwe namwe mwe nge ndi wo. Muwona masoka ghangu ndipo mutopa!

²²Kumbi ine ndanena, ‘Mundipaske cha wanangwa’? Pamwenga, ‘Mundipaske chimbundi cha vyuma vinu’?

²³Pamwenga, ‘Munditaske ku janja la ŵakupindikana ŵangu’? Pamwenga, ‘Mundiwombo ku janja laku wo ŵatindikandirizga’?

²⁴“Ndisambizgeni ndipo nkhajanga chisisi. Mundiziŵiske ndiwemo mo ndanangiya

²⁵Mbukuru nawo wa nthazi za mazu ghauneneska! Kweni kuchenya kwinu muchenya chine?

²⁶Kumbi mughanaghana kuti mungachenya po kakambidu ka munthu wakugwereruka nthazi ndi mphepo yaŵaka?

²⁷Nadi mungaphwatiya pasi wambura awiske ndi kuguliska mubwezi winu.

²⁸“Kweni sono, kondwani pakundilereska; chifukwa kuti nkhatetanga cha pa maso pinu.

²⁹Ng'anamukani, ndimurombani, kwananga kungachitikanga cha. Ng'anamukani sono pakuti kujivikiriya kwangu kwe pa mlando uwo.

³⁰Kumbi ulipo ubudi mu lilime langu? Kumbi kuti mlomo wangu ungaziŵa cha kulaŵa soka?