Read gitonga Sumu 102 Bible Online

Sumu 102 - gitonga bible

Sumu 102

¹Rombu la wakusuzgika, po watomboroka, wapunguliya chigwinini chake paurongo paku Chiuta Avwani kuromba kwangu Ambuya; nkhuta yangu yize kwaku imwe!

²Rekani kubisa chisku chinu kwaku ine mu zuŵa la suzgu yangu! Tegherzgani kwangu, ndipo mundamuke ruŵi ndichidana!

³Pakuti mazuŵa ghangu gharuta nge ndi usi; liŵavu langu linyeka nge ndi nkhuni ku moto.

⁴Ndipupikiya pasi nge mbuteka wakumira; chirghoko cha vyakurgha chawala.

⁵Nditamantha ukongwa; liŵavu lamara vyaja viŵanga pe.

⁶Ndakozgana ndi tofu wamu bozwa; ndaŵa nge ndi phururu wamu mapopa.

⁷Ndicherezga wambura tulo, ndaŵa nge nkhayuni kakuŵa kija pa bagha pachanya.

⁸Ŵarwani wangu watinditoza zuŵa lose; wose ŵakundiseka ŵatemba pa zina langu.

⁹Nditurgha vyoto nge nchiŵande, ndipo vyakumwa vyangu vyatimbulinkhang'a ndi masozi,

¹⁰chifukwa cha mbembe yinu ndi ukari winu; mwandinya muwa ndikundipong'a kutali.

¹¹Mazuŵa ghangu ghayana ulaka nchiduzi pa lumwi lipendama; ndikozgana ndi uteka wakumira.

¹²Kweni imwe, Ambuya, mwe karonga muyaya; zina linu lijaririya ku migonezi yose.

¹³Imwe mukasokanga ndi kuchitiya lisungu Zioni; nyengo yakumuchitiya lisungu yafika; nyengo yo njeniyi!

¹⁴Ŵateŵeti ŵinu ŵatumwanja chingana ngwakupasuka; ŵatimuchitiya lisungu, chingana wakubwanganduka.

¹⁵Mitundu yikawopanga Ambuya; ŵakaronga wose ŵa charu chapasi ŵakawopanga mazaza ghinu.

¹⁶Ambuya achizenga so Zioni, akavumbuwanga ukuru wawo.

¹⁷Akavwanga ŵanthu ŵawo ŵakupatika, ndipo akategherezganga ku rombu lawo.

¹⁸Cho Ambuya akuchita chilembeke mgonezi wo utuza, alinga kuti ŵanthu wo ŵandapapike ŵaŵarumbe iwo.

¹⁹Ambuya mu malo ghawo ghakupaturika ghapachanya angulereska pasi, angulereska pasi kutuliya kuchanya.

²⁰Kuvwa kutamantha kwa ŵakumangika, ndi kuŵafwatuwa wo ŵangweruzgikiya ku kubayika.

²¹Ndipo ŵanthu ŵakataulanga zina la Ambuya mu Zioni; ŵakaperekanga viwongo kwaku iwo mu Yerusalemu,

²²penipo mitundu ndi maufumu ŵaunjikana pamoza kusopa Ambuya.

²³Nthazi yangu afyore munthowa ndenga ndi ndakote; afupikiska mazuŵa ghangu.

²⁴Mwa Chiuta wangu, ndititi, rekani kundito sono, ndenga ndindakote! Ambuya imwe mwe akujaririya muyaya.

²⁵Charu chapasi mukuchilenga mwaka ukongwa, ndipo ndi manja ghinu mungwata machanya.

²⁶Vyose vikamaranga, kweni imwe mukajaririyanga; vyose vikachujukanga nge vyakuvwara. Imwe mukavisinthanga nge ndi maraya, ndipo vikamaranga.

²⁷Kweni imwe nyengo yose mwe nge ndimo muliri, umoyo winu ulivi chigoti.

²⁸Ŵana ŵa ŵateŵeti ŵinu ŵakajanga umamphavi, ndipo mazuŵa ghose mphapu yawo yikakhozgekanga paurongo pinu.