Read gitonga Sumu 104 Bible Online

Sumu 104 - gitonga bible

Sumu 104

¹Rumbanga Ambuya, wa mzimu wangu! Ambuya, Chiuta wangu, mwe ŵara ukongwa! Mukuvwarikika ulemu ndi unkhankhu;

²mwajivwinkha ndi kungweruka nge ndi raya, mwatandika machanya nge ndi hema.

³Mwazenga muzi winu pachanya pa maji, wakusanduska mabingu gareta lake, ndi kwenda pa mapapa gha mphepo.

⁴Muchitiska zimphepo nge ndi mathenga ghinu, kumwetuka kwa limphezi nge mbateŵeti ŵinu.

⁵Mwajariska charu pa viŵanja vyake, mwakuti chireke kusukunika muyaya.

⁶Mwachikukiska ndi nyanja ulaka ndi khanju, ndipo maji ghanguburumutizga mapiri.

⁷Kweni po imwe munguchenya maji ghanguthaŵa; penipo ghanguvwa kukambura kwinu kwa kulangula, ghanguŵiriŵitiya kutali.

⁸Ghangukwere mu mapiri ghangusikiya mu vidika, ku malo gho mungughajarikapo.

⁹Mungughaŵikiya mphaka kuti ghareke kujumpha, alinga kuti ghareke kuburumutizga so charu chapasi.

¹⁰Mubwibwituska maji mu madambo, ghatenda mukati mu mitunthu.

¹¹Vipaska maji ku nyama za mudondo; ŵabori ŵazimwizga nyota yawo.

¹²Tuyuni tuzenga vivimbu vyawo mu miti yo ye pafupi ndi tutumba.

¹³Mung'iska vuwa pa mapiri kutuwa kuchanya, ndipo charu chazaza ndi vitumbiku vinu.

¹⁴Mumezge ng'ombe uteka, ndi mbutu kuti munthu waziphwere, viyo waronde vyakurgha mu charu.

¹⁵Wapanga vinyo kuti wakondweskenge mtima wake, mafuta kuŵaliska chisku chake, ndi kurgha kwakumupaska nthazi.

¹⁶Milanji yaku Lebanoni yironde vuwa yinandi, miti ya Ambuya, yo iwo angupanda.

¹⁷Viyuni vizenga vivimbu vyawo mwenimuwa; tofu nayo wendi nyumba yake mwenimo.

¹⁸Mbaŵa zija mu mapiri ghatali, ndipo mbira zibisama mu majarawe.

¹⁹Mukulenga mwezi kurongo zinyengo; dazi liziŵa kusere kwake.

²⁰Imwe mukwata usiku, ndipo mu mdima vinyama vyose vya mu dondo vituwa.

²¹Nkharamu za mpupuka zikoroma uku ziŵinga, kupenja kurgha ko Chiuta watizipaska.

²²Asani lumwi latuwa ziwere vuli, kwachigona pasi mu mphanji zawo.

²³Sono ŵanthu ŵatuliya ku nchitu zawo, ŵatakataka mpaka mazulo.

²⁴Ambuya, mwachita vinthu vinandi ukongwa! Ndi zeru yinu mwachita ivi vyose! Charu chapasi chazaza ndi vyose imwe mwalenga.

²⁵Nyanja ndi yiya, yikuru ndi yisani, mwenimo vilengiwa vyambura maŵerengeka vija, vikuru ndi vimana viyo.

²⁶Ngaraŵa zitenda mwenimo, ndipo njoka ya mu nyanja yo mukulenga yiseŵe mwenimo.

²⁷Vyose ivi vithamiya imwe, kuvipaska kurgha pa nyengo zake.

²⁸Mutivipaska ndipo vironda, mutivinozge kurgha, ndipo viturgha viguta.

²⁹Asani mwabisa chisku chinu, vichita mantha; ndipo asani mwatuzgako mvuchi winu, vitufwa; ndi kuwere ku dongo ko vingutuliya.

³⁰Kweni asani mwavipaska mvuchi, vituŵa ndi umoyo; mupaska umoyo ufya ku charu.

³¹Unkhankhu wa Ambuya ujaririyenge muyaya! Ambuya akondwenge mwaku vyo atata!

³²Iwo alereska pa charu chapasi, ndipo chitenthema; achikwaska mapiri, ghasunkha usi.

³³Ndimbiyenge Ambuya ndichiŵa wamoyo; ndikoŵeriyenge marumbu kwaku Chiuta wangu mu umoyo wangu wose.

³⁴Mphanyi Ambuya akondwa ndi sumu yangu, chifukwa atindikondweska.

³⁵Ŵaheni ŵaparghang'ike mu charu chapasi; ŵakulakwa kuti ŵaŵemo so cha! Rumbanga Ambuya wa mzimu wangu! Rumbanga Ambuya!