Read gitonga Sumu 109 Bible Online

Sumu 109 - gitonga bible

Sumu 109

¹Ku wakumba mura. Sumu yaku Davidi A Chiuta, ndirumba imwe; rekani kuja chisisi!

²Ŵanthu ŵaheni ndi ŵatesi ŵandizinga, ŵakamba ghakupusika paku ine.

³Ŵatindikambiya vinthu vyakofya, ŵarwana nane kwambura kafukwa.

⁴Ŵatindisuska, nanga ndipenipo ine ndituŵanja, ndipo ndituŵarombe.

⁵Ŵatindiripa uheni pakuŵachitiya umampha ndi kutinkha po ine ndituŵanja.

⁶Tondoni munthu wankhaza weruzgi wakupindikana wangu, zomerani kuti yumoza wa ŵarwani ŵake ndiyo wamulange.

⁷Weruzgike ndi wasanirike kuti ngwakulakwa, nanga ndi rombu lake liwe nge nkhwananga.

⁸Mazuŵa ghake ghaŵe ghamanavi; munthu munyake waphange usambasi wake!

⁹Ŵana ŵake ŵaŵe ŵaranda muwoli wake waŵe choko!

¹⁰Ŵana ŵake ŵaŵe ŵakuyinga ndi ŵakupempha, kutuwa mu mapopa mo ŵaja ŵadikiskikiye kutali!

¹¹Ŵameteu ŵake ŵamukwamphuwe vyose vyo wenavyo; ŵalendo ŵaskowe vyose vyo wangusaniya mu kutakataka.

¹²Paulevi nanga njumoza wakumuchitiya lisungu, paulevi nanga njumoza wakuphwere ŵana ŵake ŵaranda.

¹³Mphapu yake yose yakuza kuvuli yifwe, ndipo mu mgonezi wo utuza zina lake liruwike.

¹⁴Ambuya akumbuke kubende kwa awiske, uheni wa anyina ureke kugowokereka.

¹⁵Nyengo yose Ambuya akumbuke ma utimbanizighawo, ndipo iwo ŵeneko ŵaruwikiye limu!

¹⁶Munthu yo kuti waghanaghanako ndi kuŵa walisungu cha; kweni wanguzingizga ndi kubaya, mukavu, msauchi, ndi wakusweka mtima.

¹⁷Wangwanja kutemba, nayo watembeke! Wangukana kutumbika, nayo so paulevi wakumutumbika!

¹⁸Wangujivwarika kutemba ulaka ndi raya lakuvwara, matembo ghake ghamuzumbwiske nge ndi maji, ghazumbwiske viwanga vyake nge ndi mafuta!

¹⁹Ghamuburumutizge ulaka ndi saru zakuvwinkha, ndipo nyengo yose ghamuzingirizge ulaka ndi lamba.

²⁰Iyi yiŵe mphoto yakutuliya ku Ambuya pa wakupindikana ŵangu, wo ŵakamba vinthu vyakofya nge ndi ivi paku ine!

²¹Kweni Ambuya Chiuta wangu, ndovyeni nge ndimo mukupanganirana, chifukwa cha umampha wa chanju chinu, ndipozomoskeni.

²²Nde mukavu ndi msauchi; ndalasika mpaka mukati mwa mtima wangu.

²³Ndizgeŵereke ulaka nchiduzi cha mazulo; ndiputiskika ulaka ndi zombe.

²⁴Makongono ghangu ghalivi nthazi chifukwa chakusoŵa kurgha; liŵavu langu larombotoka ndi konda.

²⁵Ndaŵa chisunjizgu ndi chakusekeka ku ŵakupindikana nane; ŵachindiwona, ŵapukung'a mitu yawo.

²⁶Ambuya, Chiuta wangu, ndovyeni; nditaskeni chifukwa cha chanju chinu chakufikapo!

²⁷Ŵaziŵiskeni ŵarwani ŵangu kuti imwe ndimwe mutinditaska.

²⁸Ŵanditembe iwo, kweni imwe munditumbike, ŵamawongo ŵangu ŵachitisoni, kweni mteŵeti winu wakondwenge.

²⁹Ŵarwani ŵangu ŵarengeskeke; ŵavware soni zawo nge nchirundu!

³⁰Ndikambuliyenge viwongo ku Ambuya. Ndiŵarumbenge mukati mu mzinda wa ŵanthu,

³¹chifukwa ŵavikiriya msauchi ndi kumutaska kwaku wo ŵatimweruzgiya ku nyifwa.