Read gitonga Sumu 115 Bible Online

Sumu 115 - gitonga bible

Sumu 115

¹Kwaku ifwe cha, Ambuya, kwaku ifwe cha, kweni ku zina linu paskani unkhankhu, chifukwa cha chanju chinu chakufikapo ndi ukongorekwa winu!

²Yitifumbiyengenji mitundu, “Wepani Chiuta winu?”

³Chiuta widu we kuchanya, wachita chose cho wakhumba.

⁴Ŵangoza ŵawo mba siliva ndi golide, nchitu ya manja gha ŵanthu.

⁵Milomo ŵe nayo, kweni kuti ŵarongoro cha; maso ŵe nagho, kweni kuti ŵalereska cha.

⁶Makutu ŵe nagho, kweni kuti ŵatuvwa cha; mphunu ŵe nazo, kweni kuti ŵanuska cha.

⁷Manja ŵe nagho, kweni kuti ŵako cha; marundi ŵe nagho, kweni kuti ŵatenda cha; ndipo kuti ŵakambiya mu chigoromero chawo cha.

⁸Wo ŵati ŵapanga ŵakozgana nawo; viyo so ndimo waliri yose wakugomekezga mwaku wo.

⁹Gomekezgani mu Ambuya, mwa ŵa Yisraele! Ndiwo chovyo chinu ndi nguru yinu.

¹⁰Gomekezgani mu Ambuya, mwa ŵanyumba yaku Aroni! Ndiwo chovyo chinu ndi nguru yinu.

¹¹Mose mwa ŵakopa Ambuya, gomekezgani mu Ambuya! Ndiwo chovyo chinu ndi nguru yinu.

¹²Ambuya atitikumbuka, akatitumbikanga; akatumbikanga nyumba yaku Yisraele, akatumbikanga nyumba yaku Aroni;

¹³atumbikenge wose akopa Ambuya, ŵamana ndi ŵara kwakukozgana.

¹⁴Ambuya apaska imwe ŵana, imwe ndi mphapu yinu.

¹⁵Mutumbikike ndi Ambuya akwata malo gha kuchanya ndi charu chapasi!

¹⁶Kuchanya nkhuchanya kwa Ambuya, Kweni charu chapasi akupaska ku ŵana ŵa ŵanthu.

¹⁷Ŵakufwa kuti ŵarumba Ambuya cha, pamwenga nanga njumoza yo wasikiya ku malo gha chetechete.

¹⁸Kweni ifwe, taŵamoyo, titumbikenge Ambuya, kutuwa kuno ku sono mpaka ku muyaya. Rumbani Ambuya!