Read gitonga Sumu 118 Bible Online

Sumu 118 - gitonga bible

Sumu 118

¹Wongani Ambuya, chifukwa mbamampha; chifukwa ncha muyaya chifundu chawo!

²Wanene sono Yisraele, “Chifukwa ncha muyaya chifundu chawo.”

³Yinene nyumba yaku Aroni, “Chifukwa ncha muyaya chifundu chawo.”

⁴Ŵanene wose ŵakopa Ambuya, “Chifukwa ncha muyaya chifundu chawo.”

⁵Mu soka langu ndingudana ku Ambuya; Ambuya angundamuka, ndi kundiŵika mwanangwa.

⁶Ndi Ambuya pamoza nane, kuti nditopa cha; wachitengenji nane munthu?

⁷Ambuya ŵe kuchiri kwangu kundovya; ndipo ndikawonanga kuthereskeka kwa ŵarwani ŵangu.

⁸Nkhwamampha kudingang'a mwa Ambuya, kwakuruska kugomezga munthu.

⁹Nkhwamampha kudingang'a mwa Ambuya kwakuruska kugomezga mu mafumu.

¹⁰Mitundu yose yingundizinga; kweni mu zina la Ambuya ndinguŵaparghang'a!

¹¹Ŵangundizinga kwetere, kundizinga kose kose; kweni mu zina la Ambuya ndinguŵaparghang'a!

¹²Ŵangundizinga nge ndi njuchi, kweni ŵangufya ruŵi nge ndi moto mu minga; ndinguŵadumuwa mu nthazi ya Ambuya!

¹³Ndingukoreka kwa kofya pafupi kuwa, kweni Ambuya angudovya.

¹⁴Ambuya ndi nthazi yangu ndi sumu yangu; ndiwo Mtaski wangu!

¹⁵Avwani kukambura kwa likondwa la upundi mu mahema gha ŵarunji: “Janja lakurghiya la Ambuya lachita ichi!

¹⁶Janja lakurghiya la Ambuya lakwezgeka, janja lakurghiya la Ambuya lichita kwakukhuza.”

¹⁷Ine kuti ndikafwanga cha, kweni ndiŵenge wamoyo; ndikambenge vyo Ambuya achita.

¹⁸Ambuya andilanga ukongwa, kweni kuti andipereka ku nyifwa cha.

¹⁹Ndijuriyeni malikomo gha urunji, ndiserenge mwenimo, ndikupereka viwongo ku Ambuya.

²⁰Ili ndi lokomo la Ambuya; wakurunjika waserenge mwenimo.

²¹Ndimuwongani chifukwa mwandamuka, ndipo mwaŵa chipozomosko changu.

²²Mwa wo ŵazengi ŵanguwupata ndiwo wazgoka mutu wa nyondo.

²³Chachitika ndi Ambuya ichi, ndipo nchakuziziswa mu maso ghidu.

²⁴Ili ndi zuŵa lo Ambuya achita; tangare ndi tikondwe mwaku lo.

²⁵Titaskeni, tikuŵeyani Ambuya! Ambuya, tikuŵeyani Ambuya! Ambuya, tikuŵeyani, tisakatiskeni!

²⁶Ngwakutumbikaka yo watuza mu zina la Ambuya! Tikutumbikani kutuwa mu nyumba ya Ambuya.

²⁷Ambuya ndiyo Chiuta; ndiuo watipaska ukweru. Ndi vivwati vya miti mu manja yambani dghera, kurazga ku masengwe gha chiguŵa!

²⁸Ndimwe Chiuta wangu, ndiwongenge imwe; ndimwe Chiuta wangu, nditaulenge ukuru winu.

²⁹Wongani Ambuya, chifukwa mbamampha; chifukwa ncha muyaya chifundu chawo!