Read gitonga Sumu 119 Bible Online

Sumu 119 - gitonga bible

Sumu 119

¹Ŵakutumbikika ndi ŵeniwo ŵalivi kalema mu nthowa yawo, wo ŵatenda mu dangu la Ambuya.

²Ŵakutumbikika mbeniwo ŵasunga visimisimi vyawo, wo ŵati ŵapenja ndi mtima wawo wose.

³Nadi kuti ŵachita kubende cha; ŵatenda mu nthowa ya Ambuya.

⁴Imwe mwatipaska marangu ghinu kuti tighavwiye ndi chivwanu.

⁵Mphanyi nthowa zangu zinguŵa zakufikapo pa kusunga marangu ghinu!

⁶Asani ndiphwere visimisimi vinu vyose, ipo kuti ndikalengeskekanga cha.

⁷Po ndisambira vyeruzgu vinu vyakurunjika, ndikurumbeninga ndi mtima wakunyoroka.

⁸Marangu ghinu ndikavwiyanga; mungandipatiyanga limu cha!

⁹Muhurwa wangatozga uli nthowa yake? Pakuvwiya visimisimivinu.

¹⁰Nditimupenjani ndi mtima wangu wose; mungandizomerezganga cha kureka kuvwiya malangulu ghinu!

¹¹Mazu ghinu ndasunga mu mtima wangu, alinga kuti ndireke kumunangiyani imwe.

¹²Wakutumbikika ndimwe, Ambuya: ndisambizgeni virunguchizgu vinu!

¹³Ndiwerezgengepo so kukamba, marangu ghose gho mwandipaska.

¹⁴Ndikondwere pa kurondo visimisimi vinu, kwakuruska kuŵa ndi usambasi unandi.

¹⁵Ndirungurukenge ndi viringuchizgu vinu; ndikulereska pa nthowa zinu.

¹⁶Ndendi likondwa mu marangu ghinu, kuti ndiruwenge visimisimi vinu cha.

¹⁷Chitiyani umampha mteŵeti winu alinga kuti ndiŵe wamoyo ndi kusunga mazu ghinu.

¹⁸Jurani maso ghangu, mwakuti ndilereske vyakuziziswa vya mu dangu linu.

¹⁹Nde mlendo mu charu chapasi; mungabisanga malangulu ghinu kwaku ine!

²⁰Mtima wangu usweka ndi linweka, nyengo zose ndinweke kuziŵa vyeruzgu vinu.

²¹Muchenya ŵakujikuzga; mba kutembeka wo ŵapatukako ku marangu ghinu.

²²Ndituzgeniko ku chisunjizga chawo ndi kuyeya kwawo, chifukwa ine ndasunga visimisimi vinu.

²³Inya nanga ŵakuwusa ŵawungana ndi kundichitiya chiŵembu, nda mteŵeti winu, ndisambirenge virunguchizgu vinu.

²⁴Visimisimi vinu vitindikondweska; ndivyo vitindipangizga.

²⁵Mzimu wangu umeremete ku fuvu; mundisisipuske kwakulingana ndi mazu ghinu!

²⁶Po ndingusumuwa vyose vyo ndikuchita, imwe mungundamuka; ndisambizgeni virunguchizgu vinu!

²⁷Ndiziŵiskeni nthowa ya malangulu ghinu, ndipo ndirungurukenge ndi nchitu zinu zakuziziswa.

²⁸Mzimu wangu usongonoka ndi chitima; ndinthaziskeni, kwakuyana ndi mazu ghinu.

²⁹Tuzganiko kwangu, nthowa zakupusika; ndipo kwa wezi mundisambizge dangu linu!

³⁰Ndasankha nthowa ya ukongorekwa; malangulu ghinu ndaŵika paurongo pangu.

³¹Ambuya, ndameremete ku visambizgu vinu; rekani kuzomera kuti ndilengeskeke!

³²Ndivwiyenge malangulu ghinu ndi mwamphu wose, chifukwa mukandipaskanga kuwamo kukuru.

³³Ambuya, ndisambizgeni, kang'anamulidu ka marangu ghinu, ndipo ndighavwiyenge nyengo yose.

³⁴Ndipaskeni kuwamo, kuti ndisunge dangu linu: ndikalisunganga ndi mtima wangu wose.

³⁵Mundirongozge mu nthowa ya malangulu ghinu, chifukwa mwaku ghenigho ndimu ndikondwere.

³⁶Mtima wangu urazge ku visimisimi vinu, kwakuruska kukwanduwa usambasi.

³⁷Wezgani maso ghangu ku kulereska vyo vyambura chanduwu; ndipaskeni umoyo mu nthowa zinu.

³⁸Sungani phanganu linu, ku mteŵeti winu, lenilo mupaska kwaku wo ŵatopa imwe.

³⁹Nditaskeni ku matozu gho nditopa; pakuti visimisimi vinu vyamampha!

⁴⁰Ehe, ndikhumbira virunguchizgu vinu; mu urunji winu ndipaskeni umoyo!

⁴¹Ambuya, chanju chinu chize paku ine, ndipo nditaskeni kwakulingana ndi phanganu linu.

⁴²Sono ndiziŵa kuŵamuka wo ŵatinditoza, chifukwa ndigomekezga mu mazu ghinu.

⁴³Ndizomerezgeni kukamba uthenga wa uneneska nyengo yose, chifukwa chigomezgu changu che mu vyeruzgu vinu.

⁴⁴Ndikasunganga dangu linu nyengo yose, muyaya ndi muyaya!

⁴⁵Ndipo ndikajanga mu wanangwa wakufikapo, chifukwa ndesa kuvwiya visimisimi vinu.

⁴⁶Malangulu ghinu ndikambenge ku ŵakaronga, ndipo kuti ndiŵenge wasoni cha.

⁴⁷Mukuvwiya malangulu ghinu ndikankhaŵiya, chifukwa ndigho nditanja.

⁴⁸Nditumbika ndi kwanja malangulu ghinu; mu virunguchizgu vinu ndirungurukenge.

⁴⁹Kumbukani phanganu linu, ku mteŵeti winu; pakuti landipaska chigomezgu.

⁵⁰Nanga ndi mu suzgu yangu ndinguŵa wakusangaruka, chifukwa phanganu linu likundipaska umoyo.

⁵¹Ŵakujikuzga ŵandiwera, kweni kuti ndapatukako cha ku dangu linu.

⁵²Ndichikumbuka virunguchizgu vyo mukundipaska kali, ndi sangaruka, Ambuya.

⁵³Ndizazika ndi ukari chifukwa cha ŵaheni, wo ŵatuswa dangu linu.

⁵⁴Virunguchizgu vinu vyaŵa sumu zangu mu nyumba ya ulendo wangu.

⁵⁵Ambuya, mu usiku ndighanaghana ndi imwe, ndipo ndisunga dangu linu.

⁵⁶Ichi nchimwemwe changu: chakuti ndasunga marangu ghinu.

⁵⁷Ndimwe pe ndikhumba, Ambuya; ndipangana kuvwiya marangu ghinu.

⁵⁸Ndipempha wezi winu ndi mtima wangu wose; kwakulingana ndi phanganu linu, ndichitiyeni wezi!

⁵⁹Po ndighanaghana ndi nthowa zinu, ndiwezge marundi ghangu ku visimisimi vinu.

⁶⁰Kwambura kuswera, nditinthimika kuvwiya malangulu ghinu.

⁶¹Nanga vingwe vya ŵaheni vyandizinga, kuti ndiruwa dangu linu cha.

⁶²Mukati mu usiku ndiyuka kutumbika imwe, chifukwa vyeruzgu virunji.

⁶³Nde bwezi laku wose wo ŵatopa imwe; laku wose wo ŵavwiya marangu ghinu.

⁶⁴Ambuya, charu chose chazala chifundu chinu; ndisambizgeni malangulu ghinu!

⁶⁵Ambuya, kwakuyana ndi mazu ghinu, mwachita umampha, kwaku ndamteŵeti winu.

⁶⁶Ndisambizgeni vinjeru ndi cheruzgu chamampha chifukwa ndagomekezga mu vilangulu vinu!

⁶⁷Mwenga mundandilange ndajendiyanga bweka, kweni sono ndivwiya mazu ghinu.

⁶⁸Mwe amampha, ndi aulemu; ndisambizgeni vilangulu vinu!

⁶⁹Ŵanthu ŵakujikuzga ŵakamba vyautesi paku ine, kweni ndi mtima wangu wose ndisunga virunguchizgu vinu;

⁷⁰mtima wawo ngwakununa nge ndi mafuta, kweni ine likondwa langu le mu dangu linu.

⁷¹Kulangika kwangu kungundiŵiya kwamampha, alinga kuti ndisambire vilangulu vinu.

⁷²Dangu lo imwe mupaska ndakuzirwa ukongwa kwangu, kwaku ruska chuma chose mu charu chapasi.

⁷³Mukundilenga ndimwe; ndipaskeni kuziŵa, mwakuti ndisambire marangu ghinu.

⁷⁴Wo ŵatopa imwe ŵachindiwona ŵakondwenge, chifukwa ndigomekezga mu mazu ghinu.

⁷⁵Ndiziŵa Ambuya, kuti vyeruzgu vinu vyakurunjika, mungundilanga chifukwa mwe amagomekezgeka.

⁷⁶Chifundu chinu chindisangaruske kwakuyana ndi phanganu linu ku mteŵeti winu.

⁷⁷Ndichitiyeni lisungu, ndipo ndiŵenge wamoyo, pakuti mu dangu linu mwe kukankhaŵiya kwangu.

⁷⁸Ŵalengeskeke ŵakujikuzga, pakuti ŵatindisuska kwa utesi; kweni ine, ndirungurukenge ndi virunguchizgu vinu.

⁷⁹Zomerani kuti wose wo ŵatopa inwe ŵang'anamukiye kwangu, mwakuti ŵaziŵe visimisimi vinu.

⁸⁰Mtima wangu uvwiye malangulu ghinu, mwakuti ndireke kulengeskeka.

⁸¹Mzimu wangu utakamiya pakunweka utaski winu; chigomezgu changu che mu mazu ghinu.

⁸²Maso ghangu ghavuka kukhazga vyo imwe mukupangana, ndifumba, “Kumbi mukandisangaruskanga zuŵanji?”

⁸³Pakuti ndasanduka wa waka nge ndi thumba la chikopa la vinyo lakuguga; kweni ndipuuli kuti ndaruwa vilangulu vinu cha.

⁸⁴Ndikalindizganga mpaka zuŵanji ndamteŵeti winu? Wo ŵatindizingizga mukaŵalanganga zuŵanji?

⁸⁵Ŵakujikuzga, wo kuti ŵavwiya dangu linu cha, ŵandikumbiya mbuna.

⁸⁶Malangulu ghinu ghose ngauneneska; ndovyeni, ŵanthu ŵandiwemba kwa utesi!

⁸⁷Ŵayisaniya limu nthowa yakundibayiya, kweni kuti ndajowo virunguchizgu vinu cha.

⁸⁸Chifukwa cha chanju chinu chakufikapo, mundisunge wamoyo, alinga kuti ndisungenge visimisimi vinu.

⁸⁹Ambuya, mazu, ghinu ghakajaririyanga muyaya; ghakukhozgeka kuchanya.

⁹⁰Umagomekezgeka winu ngwa mgonezi ndi mgonezi; mwajarika charu mu malo ndipo chakho.

⁹¹Vinthu vyose vyakho mpaka ku zuŵa lino chifukwa cha kulangula kwinu, chifukwa vinthu vyose mbateŵeti ŵinu.

⁹²Asani dangu linu lengavi kuŵa chimwemwe changu, mphanyi ndikufwa mu kulangika kwangu.

⁹³Kuti ndikapatanga virungu chizgu vinu cha nyengo yose, chifukwa mwaku vyenivyo imwe mwandisunga wamoyo.

⁹⁴Nde winu, nditaskeni! Chifukwa ndesa kusunga virunguchizgu vinu.

⁹⁵Ŵanthu ŵaheni ŵakhazga kundibaya, kweni ine ndighanaghanenge mu marangu ghinu.

⁹⁶Ndasambira kuti palivi cho nchakurunjika kwakufikapo; kweni langulu linu lirivi chigoti.

⁹⁷A, nditanja mbwenu dangu linu! Ndighanaghana nalo zuŵa lose.

⁹⁸Langulu linu litindipaska zeru kwakuruska ŵarwani ŵangu wose.

⁹⁹Ndendi vinjeru kwakuruska ŵasambizgi ŵangu wose, chifukwa ndighanaghana mu virungu chizgu vinu.

¹⁰⁰Ndiwamo ukongwa kwakuruska makhongwe, chifukwa ndivwiya malangulu ghinu.

¹⁰¹Ndakanizga marundi ghangu ku nthowa zose ziheni, chifukwa ndikhumba kuvwiya mazu ghinu.

¹⁰²Kuti ndapatukako cha ku visimisimi vinu, pakuti ndimwe mukundisambizga.

¹⁰³Nako nkhunowa kwa mazu ghinu pakughesa; mu mlomo wangu ghanowa kwakuruska uchi!

¹⁰⁴Mu marangu ghinu nditanduwamo zeru, chifukwa cho nditinkha nthowa zose ziheni.

¹⁰⁵Mazu ghinu ndi nyali kumarundi ghangu, ndi ukweru wa nthowa yangu.

¹⁰⁶Ndarapa rapu ndipo ndalikhozga, kuvwiya virunguchizgu vinu virunji.

¹⁰⁷Ndasuzgika ukongwa; kwakuyana ndi mazu ghinu Ambuya, ndisisipuskeni!

¹⁰⁸Rondani mipasku yangu ya kurumba, Ambuya, ndipo ndisambizgeni vyeruzgu vinu.

¹⁰⁹Umoyo wangu wemu janja langu zuŵa ndi zuŵa; kweni dangu linu kuti ndiruwa cha.

¹¹⁰Ŵaheni ŵandithya chiŵana, kweni kuti ndaranda pa malangulu ghinu cha.

¹¹¹Visimisimi vinu nchihara changu cha muyaya; ndivyo likondwa la mtima wangu.

¹¹²Mtima wangu wasankha kuvwiya vyeruzgu vinu, mpaka pa zuŵa la nyifwa yangu.

¹¹³Nditiŵatinkha ŵanthu ŵa mitima yiŵi, kweni nditanja dangu linu.

¹¹⁴Ndimwe chakubisamamo changu ndi nguru yangu; ndigomekezga mu mazu ghinu.

¹¹⁵Tuwaniko kwangu, mose mwaŵakuchita utimbanizi, mwakuti ndisungenge malangulu ghaku Chiuta wangu.

¹¹⁶Ndichirikiriyeni kwakuyana ndi phanganu linu, mwakuti ndiŵe wamoyo, mu chigomezgu changu ndireke kurengeskeka.

¹¹⁷Ndichirikiriyeni, alinga kuti ndiŵe wakudekha, ndipo ndidaŵirenge vyakukombo vinu mazuŵa ghose.

¹¹⁸Mupata wose ŵambura kuvwiya marangu ghinu; inya nthowa zawo za ukazuzi zawaka.

¹¹⁹Ŵaheni wose mu charu chapasi mutiŵawona nge ndi muthovu; chifukwa ichi ine nditanja visimisimi vinu.

¹²⁰Chifukwa chaku imwe, ndichita mantha, ndazazika ndi chitenthe chifukwa cha vyeruzgu vinu.

¹²¹Ndachita cho nchakwenere ndi chamampha; rekani kunditaya ku ŵarwani ŵangu!

¹²²Muŵiye mteŵeti winu ndindira ku umampha; rekani kuzomerezga ŵanthu ŵaheni kundisuzga.

¹²³Maso ghangu ghavuka kulereze uwombozi winu, kulereze kufiskika kwa chipozomosku chinu chirunji cho mukupangana.

¹²⁴Ndichitiyeni kwakulingana ndi chanju chinu chikuru, ndipo ndisambizgeni malangulu nginu.

¹²⁵Ndine mteŵeti winu; mundipaske kuwamo, mwakuti ndiziŵiske visimisimi vinu!

¹²⁶Ambuya ndi nyengo yakuti muchiti nchitu, chifukwa dangu linu lasweka.

¹²⁷Nditanja malangulu ghinu kwakuruska golide, kwakuruska golide lakwengeka.

¹²⁸Viyo ndirongozga michapu yangu mu virunguchizgu vinu vyose; nthowa zose ziheni nditinkha.

¹²⁹Visambizgu vinu vyakuziziswa; chifukwa cho ndituvivwiya ndi mtima wangu wose.

¹³⁰Kupataula kwa mazu ghinu kupaska ukweru, kupaska zeru kwaku wo mbajira.

¹³¹Ndi mlomo wakujurika ndinguyasama, mu linweka langu lamu malangulu ghinu.

¹³²Ng'anamukiyani kwangu ndipo ndichitiyeni wezi, nge ndimo mutiŵachitiya ŵakwanja imwe.

¹³³Ndikhozgeni ndingawa, nge ndimo mukukambiya; ndipo ndireke kuruskika ndi uheni.

¹³⁴Ku ŵakundikandirizgiya pasi nditaskeni, alinga kuti ndisungenge visimisimi vinu.

¹³⁵Nditumbikeni ndi uŵapo winu, ndipo ndisambizgeni marangu ghinu.

¹³⁶Masozi ghangu ghadika nge ndi msinji, chifukwa ŵanthu kuti ŵasunga dangu linu cha.

¹³⁷Ndimwe akurunjika, Ambuya, ndipo marangu ghinu ngakurunjika.

¹³⁸Vyeruzgu vyo mwapaska vyamampha ndi vyakurunjika.

¹³⁹Ukari wangu ukole nge ndi moto mukati mwangu, chifukwa wakupindikana ŵangu kuti ŵaphwere vilangulu vinu cha.

¹⁴⁰Ndakufikapo mbwenu phanganu linu! Mteŵeti winu watitanja ukongwa!

¹⁴¹Nde kanthu waka ndi wakunyozeka, kweni kuti ndipata vyeruzgu vinu cha.

¹⁴²Urunji winu ukajaririyanga muyaya, ndipo dangu linu ndakuneneska.

¹⁴³Suzga ndi urwiri vyandiwiya, kweni malangulu ghinu ghatinditore chimwemwe.

¹⁴⁴Virungu chizgu vinu vyakurunjika muyaya; ndipaskeni kuwamo, mwakuti ndiŵe ndi umoyo.

¹⁴⁵Ndi mtima wangu wose ndidana imwe; ndamukeni, Ambuya, ndipo ndisungenge malangulu ghinu!

¹⁴⁶Ndidana kwaku imwe; nditaskeni, ndipo ndirondonge visimisimi vinu!

¹⁴⁷Lumwi lenga lindatuwe ndidaniya kwaku imwe chovyo; chigomezgu changu ndiŵika mu mazu ghinu.

¹⁴⁸Usiku wose ndigona tulo cha, ndirunguruka ndi phanganu linu.

¹⁴⁹Ndivweni, Ambuya, kwakulingana ndi chanju chinu chikuru; kwakuyana ndi umampha winu, sungani umoyo wangu!

¹⁵⁰Ŵakundizingizga ŵakhazga ŵandere pafupi, ŵanthu wo kuti ŵasunga dangu linu cha.

¹⁵¹Kweni imwe mwe pafupi nane, Ambuya, ndipo malangulu ghinu ghose ngakuneneska.

¹⁵²Kali ndikusambira ndi visimisimi vinu; ndipo mukuvijarika kuti vijaririye muyaya.

¹⁵³Lereskani pa suzgu yangu, ndi nditaskeni, chifukwa kuti ndajowo dangu linu cha.

¹⁵⁴Vikiriyani mlando wangu, ndipo ndisanduskeni mwanangwa; nditaskeni nge ndimo mukupanganirana!

¹⁵⁵Ŵaheni kuti ŵakataskikanga cha, chifukwa kuti ŵapenja marangu ghinu cha.

¹⁵⁶Kweni chisungusungu chinu, Ambuya, nchikuru ukongwa, viyo nditaskeni kwakuyana ndi cheruzgu chinu.

¹⁵⁷Mbanandi ŵakundiŵemba ndi ŵarwani ŵangu, kweni kuvwiya marangu ghinu kuti nditondeka cha.

¹⁵⁸Penipo ndilereska pa ŵakupusika, ndikwiyiskika, pakuti langulu linu kuti ŵasunga cha.

¹⁵⁹Ehe, mo nditanjiya virunguchizgu vinu, Ambuya! Nditaskeni, kwakuyana ndi chifundu chinu.

¹⁶⁰Chisinkhu cha mazu ghinu mbuneneska, ndipo vyeruzgu vinu vyose virunji vya muyaya.

¹⁶¹Ŵanthu ŵanthazi ŵandizingizga kwambura kafukwa, kweni ine mtima wangu utuma pakutumbika dangu linu.

¹⁶²Ndikondwere mu mazu ghinu, nge nkhukondwa kwaku yo wasaniya usambasi unandi.

¹⁶³Nditinkha ndi kupata mautesi, kweni nditanja dangu linu.

¹⁶⁴Zuŵa ndi zuŵa nditumuwongani kankhonde ndi kaŵi, chifukwa cha vyeruzgu vinu vyakurunjika.

¹⁶⁵Wo ŵatanja dangu linu ŵendi chivekeru chakufikapo, ndipo kulivi ko kakaŵaguŵiskanga.

¹⁶⁶Ndilereze utaski winu, Ambuya, ndipo ndichita malangulu ghinu.

¹⁶⁷Mzimu wangu usunga visimisimi vinu; ndipo nditivyanja ukongwa.

¹⁶⁸Ndivwiya malangulu ndi virungu chizgu vinu; imwe muwona vyose vyo ndichita.

¹⁶⁹Kuliya kwangu kuze paurongo pinu, Ambuya, ndipaskeni kuwamo kwakulingana ndi mazu ghinu!

¹⁷⁰Kuŵeyere kwangu kuze paurongo pinu; nditaskeni kwakulingana ndi mazu ghinu.

¹⁷¹Ndirumbenge imwe nyengo yose, chifukwa mutindisambizga vyeruzgu vinu.

¹⁷²Ndimbenge vya mu dangu linu, chifukwa malangulu ghinu ngakurunjika.

¹⁷³Nyengo yose ŵani pafupi kundovya, chifukwa ndasankha malangulu ghinu.

¹⁷⁴Ndinweka chipozomosko chinu, Ambuya! Mu dangu linu ndisaniya chimwemwe.

¹⁷⁵Ndipaskeni umoyo, mwakuti ndimurumbeni imwe, virungu chizgu vinu vindovye!

¹⁷⁶Ndiyingayinga nge ndi mberere yakuranda; viyo zani ndipenjeni, ndamteŵeti winu, chifukwa malangulu ghinu kuti ndaghapata cha.