Read gitonga Sumu 139 Bible Online

Sumu 139 - gitonga bible

Sumu 139

¹Ku wakumba mura: Sumu yaku Davidi Ambuya, mwandipima, ndipo mwandithoŵa.

²Imwe muziŵa chose cho ndichita, kutuliya kutali muwamo maghanaghano ghangu ghose.

³Mupenja nthowa yangu kugona pasi kwangu; muziŵa menderu ghangu ghose.

⁴Nanga ndipenipo ndindarongoro. A! Ambuya, imwe mwaziŵa kale cho ndikarongoronga.

⁵Imwe mwandizingirizga kosekose; mutindivikiriya ndi janja linu.

⁶Kuziŵa kwinu paku ine nkhwakuziziswa; nkhwa pachanya ukongwa kuti ndingawamo cha.

⁷Ndingaya pani kuti ndithaŵe mzimu winu? Ndingathaŵiya pani, kutuwako ku maso ghinu?

⁸Asani ndingaya kuchanya, imwe namwe kweniko; asani ndingagona pasi mu charu cha ŵakufwa imwe namwe mwe kweniko!

⁹Asani ndingaphururukiya kutali ku vuma, pamwenga kuja kuchigoti cha nyanja,

¹⁰nanga nkhweniko janja linu litindirongozga, janja linu la marghe likandikoreziyanga.

¹¹Asani ndifumba munkhorwe kuti undibise, pamwenga ukweru wakundizunguliya kuti uzgoke usiku,

¹²nanga ndi munkhorwe kuti ngwakufipa cha kwaku imwe, ndipo usiku wenge nkhuŵala kwa msana. Munkhorwe ndi ukweru kwaku imwe vilingana waka.

¹³Imwe mukulenga viŵaro vyangu vya mukati, munguviŵika pamoza mu nthumbo ya ama.

¹⁴Ndimurumbani chifukwa mwe ŵakofya ndi ŵakuziziswa. Zakuziziswa nchitu zinu! Mutindiziŵa kwakufikapo;

¹⁵munguwona viwanga vyangu vichiwumbika, penipo ndalengekanga mwakubisika, ndi kurungika kwakuziziswa mu ndimba ya charu chapasi.

¹⁶Maso ghinu ghanguwona, viduswa vyangu vyose vikulembeka mu buku linu, mazuŵa ghakuti virungike po pengavi nanga nkhamoza kaku vyo.

¹⁷A Chiuta, nako nkhuzirwa kwa maghanaghanu ghinu paku ine; pakughaŵerenga nganandi ukongwa!

¹⁸Asani ndingughaŵerenga mphanyi ghatinge ghaŵenge ghanandi kwakuruska mchenga. Po ndiyuka, ndeche pamoza namwe.

¹⁹A Chiuta, mphanyi mungubaya ŵaheni! Ŵanthu ŵachiwawa mphanyi ŵangutuwako kwangu,

²⁰wo ŵakamba vya kupusa paku imwe; wo ŵayuka kumikana namwe.

²¹Ambuya, nditinkha wo ŵatinkha imwe! Ndituŵayeya wo ŵagarukiya imwe!

²²Tinkhu langu paku iwo ndakufiskika; ndituŵawona nge mbarwani ŵangu.

²³Ndipenjeni, A Chiuta, ndi ziŵani mtima wangu; ndeseni, ndipo bowozgani maghanaghanu ghangu.

²⁴Wonanimo vinu kalimo kaheni mwaku ine, ndipo ndirongozgeni mu nthowa ya muyaya.