Read gitonga Sumu 140 Bible Online

Sumu 140 - gitonga bible

Sumu 140

¹Ku wakumba mura. Sumu yaku Davidi Nditaskeni, Ambuya, ku ŵanthu ŵaheni, ndisungeni kuŵanthu ŵa viwawa.

²Nyengo yose ŵapanga viheni mu mtima wawo, nyengo yose kuyuska zindeu.

³Malilime ghawo gharasa nge nga njoka, pasi pa milomo yawo pe urwirwi wa khaku.

⁴Ndivikiriyeni, Ambuya, kumanja gha mheni: ndisungeni ku ŵanthu ŵa chiwawa, wo ŵapangana kundiwiskiya pasi.

⁵Ŵanthu ŵakujikuzga ŵandithyiya chiŵana; ŵatandika chirepa cha ukonde ndipo mu nthowa yose ŵathya viŵana kuti ndiwiremo.

⁶Ku Ambuya ndititi, “Ndimwe Chiuta wangu.” Avwani ku mazu gha kuŵeyere kwangu, Ambuya!

⁷Ambuya, Chiuta wangu, Mtaski wangu nthazi, mu nkhondo mungundivikiriya.

⁸Ambuya, ŵaheni rekani kuŵapaska cho ŵakhumba; rekani kuzomerezga viŵembo vyawo!

⁹Ŵakundizingirizga ŵasoska mutu wawo; mahomwa ghawo ghawiye pa ŵeneko.

¹⁰Maka gha moto ghaŵawiye; ŵapong'eke mu zenje ndi kuti atuwi so cha.

¹¹Wo ŵasuska ŵanyawo kwa utesi nawo ŵasuskike; mphurupuru yimusake ruŵi munthu wa nkhaza.

¹²Ndiziŵa kuti, Ambuya muvikiriye mrandu wa ŵakusuzgika, ndi kupaska cheruzgu chirunji ku musauchi.

¹³Nadi ŵarunji ŵakarumbanga imwe; wakajanga pa maso pinu.