Read gitonga Sumu 27 Bible Online

Sumu 27 - gitonga bible

Sumu 27

¹Sumu yaku Davidi Ambuya nkhungweruka kwangu ndi chipozomosko changu; ndopenge yani? Ambuya ndi linga la umoyo wangu kumbi nditenthemenge yani?

²Ŵachindifikiya ŵakuchita uheni kuzachindikambiya mautesi, ŵakupindikana nane ndi ŵamawongo, ŵakaguŵanga ndikuwa.

³Nanga lingandigoŵe liŵanja la nkhondo, mtima wangu kuti ukatenthemanga cha; nanga yitindiyukiya nkhondo, kweni ndipuuli ndikagomekezganga mbwenu.

⁴Chinthu chimoza ndafumba ku Ambuya, chenicho ndicho ndikapenjanga; kuti ndijaririye mu nyumba ya Ambuya mazuŵa ghose gha umoyo wangu, kudaŵira kunozga kwa Ambuya, ndi kupenjeska mu nyumba yawo yakupaturika.

⁵Chifukwa akandibisanga mu mduzi wawo mu zuŵa la suzgu yangu; andijariyenge mukati mu hema lawo, andimekenge pachanya pa jarawi.

⁶Ndipo sono mutu wangu ukasoskeki yanga pachanya pa ŵarwani ŵangu ŵakundizunguliya; ndipo muhema lawo ndiperekenge sembe mwakukambura ndi likondwa. Ndimbenge ndipo ndikoŵeriyenge Ambuya.

⁷Avwani, Ambuya po ndibongo kwa nthazi, ndichitiyeni wezi mundamuke!

⁸Imwe munguti, “Penjani chisku changu.” Mtima wangu kwaku imwe utiti, “Chisku chinu, Ambuya, ndichu ndipenja.”

⁹Mungabisanga kwaku ine chisku chinu. Rekani kudikiya kutali mteŵeti winu mwaukari, imwe munguŵa chovyo changu. Mungandisiyanga kutali, rekani kundisiya, A! Chiuta wachipozomosko changu!

¹⁰Ada ndi ama ŵandisiya, kweni Ambuya anditonge.

¹¹Ambuya, ndisambizgeni nthowa yinu; ndipo ndirongozgeni ku nthowa yakuti ske chifukwa cha ŵarwani ŵangu.

¹²Rekani kundipereka ku khumbo la wakupindikana nane; pakuti ŵakaboni ŵatesi ŵandiyukiya ndipo ŵatuta chiwawa.

¹³Ndivwana kuti ndikawonanga vyamampha vya Ambuya mu charu cha ŵamoyo!

¹⁴Lindizga Ambuya; uŵe wanthazi, khwima mtima; inya, lindizga Ambuya!