Read gitonga Sumu 33 Bible Online

Sumu 33 - gitonga bible

Sumu 33

¹Kondwereni mu Ambuya, mwa ŵarunji mwe! Rumbu liyana ku wakunyoroka mtima.

²Tumbikani Ambuya ndi kaligu, ŵakoŵeriyeni ndi bangwi wa malisinga chumi!

³Ambiyeni sumu yifya, mbani kwa umampha pa malisinga, ndi kukambura kukuru.

⁴Pakuti mazu gha Ambuya ngakunyoroka; ndipo nchitu yawo yose yichitika mu chigomekezgu.

⁵Atanja urunji ndi kweruzga; charu chapasi chazaza ndi chanju chikuru cha Ambuya.

⁶Pa mazu gha Ambuya machanya ghanguchitika, ndipo ndi mvuchi wa mlomo wawo maliŵanja[1] ghake ghose ghanguŵapo.

⁷Anguwunjika maji gha mu nyanjange ndi mu botolo; aŵika zindimba mu nyumba zakusungiyamo.

⁸Chope Ambuya charu chose chapasi, wose ŵakuja mu charu ŵame ndi chitenthe paku iwo!

⁹Pakuti angukamba, ndipo kunguŵa viyo; angulangula, ndipo chingumiskika.

¹⁰Ambuya asanduska kuŵa zawakafundu za mitundu ya ŵanthu, aphwanya marunguruku gha ŵanthu.

¹¹Fundu za Ambuya zakujaririya muyaya, maghanaghano gha mtima wawo ku mgonezi yose.

¹²Wakutumbikika ndi mtundu wo Chiuta wake ndi Ambuya, ŵanthu wo aŵasankha kuŵa ŵanthu ŵawo.

¹³Ambuya kuchanya alereska pasi, awona wose ŵana ŵa ŵanthu;

¹⁴kutuliya pa malo ghawo ghakujapo alereska paku wose ŵakuja pa charu,

¹⁵iwo ndiwo akuumba mitima yaku wose, ndipo athoŵa machitidu ghawo ghose.

¹⁶Palivi karonga wakutaskika ndiukuru wa nkhondo yake; ngwazi kuti yingataskika chifukwa cha nthazi yake yikuru cha.

¹⁷Kavalowa nkhondo kuti wangagomezgeka kupaska upundi cha, ndipo ndi nthazi yake yikuru ukongwa kuti wangataska cha.

¹⁸Awonani, jisu la Ambuya le pa ŵakumopa, paku ŵeniwo ŵagomezga mu chanju chawo chikuru,

¹⁹kuti ataske mzimu wawo mu nyifwa, ndi kuŵasunga ŵamoyo mu nyengo ya chilala.

²⁰Mzimu widu ulindizga Ambuya; movya widu ndi nguru yidu.

²¹Inya mtima widu ukondwere mwaku iwo, chifukwa tigomezga mu zina lawo lituŵa.

²²Ambuya, chifundu chinu chiŵe paku ifwe, nge ndimo tagomekezge mwaku imwe.