Read gitonga Sumu 34 Bible Online

Sumu 34 - gitonga bible

Sumu 34

¹Sumu yaku Davidi; wachisanduska vinjeru vyake paurongo paku Abimeleke, po wangumtuzga, ndi wanguruta Nditumbikenge Ambuya nyengo yose; nyengo yose rumbu lawo liŵenge mu mlomo wangu.

²Mzimu wangu utumbwiya mu Ambuya; ŵakusuzgika ŵavwenge ndi ŵakondwenge.

³Kuzgani Ambuya pamoza nane, tiyeni titumphuskiye pamoza zina lawo!

⁴Ndingupenja Ambuya, ndipo angundamuka, angundipozomoska mu mantha ghangu ghose.

⁵Lereskani kwaku iwo, mungweruskike; viyo visku vinu kuti vikaŵanga ndi soni cha muyaya.

⁶Musauchi uyu wangubongo, ndipo Ambuya angumuvwa, angumtaska mu visuzgu vyake vyose.

⁷Mungelo wa Ambuya watigoŵa kwakuzunguliya wose ŵakuwopa iwo, ndi kuŵataska.

⁸Laŵani ndi muwone kuti mbamampha Ambuya! Wakukondwa ndi munthu yo wadingang'a mwaku iwo!

⁹A! Opani Ambuya, mwa ŵakupaturika ŵawo, chifukwa kulivi kusauka ku ŵakuwopa!

¹⁰Nkharamu za mpupuka zisauka ndi kuvwa nja; kweni ŵakupenja Ambuya kuti ŵasauka cha kamampha kose.

¹¹Zaninga, mwa ŵana, vwani kwangu, ndikamusambizganinga kopa Ambuya.

¹²Njani munthu yo ngwakunweka umoyo, wakukhumba mazuŵa ghanandi, mwakuti wawone umampha?

¹³Sunga lilime lako ku uheni, ndi milomo yako ku kurongoro ubendizi.

¹⁴Tuwako ku uheni, chita umampha; penja chimangu, ndi uchindondoloske.

¹⁵Maso gha Ambuya ghe pa ŵakurunjika, ndi makutu ghawo ku nkhuta yawo.

¹⁶Chisku cha Ambuya chimikana ndi ŵakuchita utimbanizi, kudumuwa chinkhumbu chawo mu charu.

¹⁷Po ŵakurunjika ŵaliriya chovyo, Ambuya atuvwa, ndi kuŵataska mu visuzgu vyawo vyose.

¹⁸Ambuya ŵepafupi ku ŵakusweka mtima, ndi kuwombo mizimu yakutekenyeka.

¹⁹Vinandi viguŵisku vya murunji; kweni Ambuya atimuwombo kwaku vyose.

²⁰Asunga viwanga vyake vyose; kuti chifyokapo nanga nchimoza cha.

²¹Uheni ubayenge ŵaheni; ndipo wo ŵatinkha ŵarunji ŵasuskikenge.

²²Ambuya awombo umoyo wa ŵaŵanda ŵawo; palivi nanga njumoza wa ŵakudingang'a mwaku iwo yo wakasuskikanga.