Read gitonga Sumu 35 Bible Online

Sumu 35 - gitonga bible

Sumu 35

¹Sumu yaku Davidi Suskanani nawo, Ambuya wo ŵasuskana nane; rwanani nawo wo ŵarwana nane!

²Koni nguru ndi chivekeru, ndiposokani kundovya!

³Soroni mkondo, ndipo jarani nthowa ya wakundindondoloska! Kambani, ku mzimu wangu, “Ndine wakukupozomoska!”

⁴Ŵachiti soni ndi ŵalengeskeke ŵakupenja umoyo wangu! Wawezgeke kuvuli ndipo ŵatimbanizgike ŵakurungurukiya uheni paku ine!

⁵Ŵaŵe nge ndi mwere paurongo pa mphepo, mungelo wa Ambuya waŵadikiske!

⁶Nthowa yawo yiŵe mdima ndi yakuteremuka, mungelo wa Ambuya waŵandondoloske!

⁷Chifukwa ŵangundithya chirepa chawo kwambura kafukwa; ŵangukumbiya mbuna umoyo wangu kwambura kafukwa.

⁸Phasulu liŵaziye kwa mabuchibuchi! Ndipo chirepa cho ŵakuthya ŵawiremo ŵeneko; zomerani kuti ŵawemo ndi kuparghanika!

⁹Po ndipo mzimu wangu wangarenge mu Ambuya, kukondwere mu chipozomosko chawo.

¹⁰Viwanga vyangu vyose vikatinge, “A! Ambuya, njani wakuyana ndi imwe, ndimwe mutaska wambura nthazi kwaku yo ngwanthazi zakuruska iyo, wakutomboroka ndi msauchi kwaku mweniyo watimuskoŵa?”

¹¹Ŵakaboni ŵakari ŵayuka; ŵatindifumba vyo ine kuti nditiviziŵa cha.

¹²Watindiwezge uheni pa umampha; mzimu wanguuyuzgika.

¹³Kweni ine, po iwo ŵangutama, ndinguvwara chigudulu, ndingujisuzga mzimu pa kufunga kurgha; ndinguromba pakusindamiya mutu wangu pa chifuŵa.

¹⁴Ulaka nge ndingutenjere mbali wangu pamwenga mwana munyangu; ndingwenda nge njumoza wakuliriya anyina, ndawakukotama pasi uku nditenje.

¹⁵Kweni pakuguŵa kwangu ŵanguwungana kundiseka, ŵanguwungana pamoza kumikana nane; ŵakupunduka ŵeniwo kuti ndinguŵaziŵa cha ŵangundikambiya utesi kwambura kurekezga;

¹⁶kwambura uwopa Chiuta ŵangundiwera ukongwa, ŵangundikukutiya minyu ghawo.

¹⁷Mpaka zuŵanji, Ambuya mulereskengeko waka? Nditaskeni ku nkhaza zawo, umoyo wangu ku zinkharamu!

¹⁸Penipo ndipo ndiwongenge imwe mu unganu ukuru; mu khamu lanthazi ndirumbenge imwe.

¹⁹Kuti ŵakondwe paku ine cha, wo mbamawongo ŵangu kwambura kafukwa, ŵareke kuphaniya jiso ŵakunditinkha kwawaka.

²⁰Pakuti kuti ŵakamba chimangu cha, kweni ŵapangana gha chiŵembu paku wo mbakuja cheti mu charu, ŵakhozga mazu gha utimbanizi.

²¹Ŵayasama milomo yawo kumikana nane; ŵatiti, “Aha, Aha! Maso ghidu ghachiwona!”

²²Imwe mwachiwona, Ambuya; rekani kuja chisisi! Ambuya, mungaŵanga kutali ndi ine!

²³Mujiyuskiye muchanya, ndipo yukani pa urunji wangu, pa mlandu wangu, mwa Chiuta wangu ndi Mbuyangu!

²⁴Nderuzgeni, Ambuya, Chiuta wangu, kwakulingana ndi urunji winu; ndipo ŵareke kundiwera!

²⁵Ŵareke kunena mu mtima wawo, “Aha, apa ndipo takhumbiyanga!” Ŵareke kunena, “Tamumeza.”

²⁶Ŵachiti soni ndipo wose pamoza ŵatimbanizgike, wo ŵakondwa pa soka langu! Ŵavware soni ndi chilengesku wo ŵatijikuzga pakumikana nane!

²⁷Ŵakambure ndi chimwemwe ndipo ŵakondwe wo ŵanweke urunji paku ine, nyengo yose watinge, “Mbakuru Ambuya, wo akankhaŵiya muchimangu cha mteŵeti wawo!”

²⁸Viyo nditaulenge vya urunji winu ndi ndirumbenge imwe zuŵa lose.