Read gitonga Sumu 36 Bible Online

Sumu 36 - gitonga bible

Sumu 36

¹Ku wakumba mura. Sumu yaku Davidi, mteŵeti wa Ambuya Kwananga kwa wamphurupuru kukamba mukati mu mtima wake; palivi kopa Chiuta paurongo pa maso ghake.

²Chifukwa watijipusika mu maso gha mweneko, watiti uheni wake kuti ungabowozgeka ndi kutinkhika cha.

³Mazu gha mlomo wake mbutimbanizi ndi chinyengo wareka kuchita mwazeru ndi kuchita umampha.

⁴Watata utimbanizi pa chakurapo chake; wajimiska mu nthowa yo kuti njamampha cha; uheni kuti wapata cha.

⁵Chanju chinu, Ambuya, chisapatiya ku machanya, ukongorekwa winu mpaka ku mitambo.

⁶Urunji winu we nge ndi mapiri ghaku Chiuta, vyeruzgu vinu nge ndi ndimba yitali ukongwa; munthu ndi nyama mutaska, Ambuya.

⁷A! Naku nkhuzirwa kwa chifundu chinu, A Chiuta! Ŵana ŵaŵanthu ŵadingang'a mu chiduzi cha mapapiku ghinu.

⁸Ŵaguta ndi vyauzari vya nyumba yinu, ndipo mutiŵamweska mu msinji wa vyakukondweska vinu.

⁹Pakuti chisima cha umoyo che ndi imwe; mu kungweruka kwinu ifwe tiwona ukweru.

¹⁰Rutirizgani chanju chinu chikuru kwaku wo ŵatimuziŵani, ndi chipozomosko chinu ku ŵakutowa mu mtima!

¹¹Lireke kundiziya rundi la wakujikuzga, nanga ndi janja la ŵaheni lireke kundidikiska.

¹²Ŵawa penipa ŵakuchita utimbanizi ŵawiskika pasi, ŵatondeka kuyuka.