Read gitonga Sumu 37 Bible Online

Sumu 37 - gitonga bible

Sumu 37

¹Sumu yaku Davidi Ungafyanga mtima cha chifukwa cha ŵakuchita uheni, chingana nkhuŵiniwa ŵakuchita ubendezi.

²Pakuti ŵakamiranga ruŵi nge mbuteka, ndipo nge nchipozwa chiŵisi ŵafotenge.

³Gomekezga mu Ambuya, chita umampha; viyo ukajanga mu charu, ndi kukondwa umamphavi.

⁴Kankhaŵiya mu Ambuya, ndipo akakupaskanga cho mtima wako unweka.

⁵Kunkhuzgiya ku Ambuya nthowa yako; gomekezga mwaku iwo, ndipo iwo akachitanga.

⁶Atuzgenge urunji wako pakweru nge nkhungweruka, ndi kweruzga kwako nge ndi msana pakati.

⁷Uje chisisi paurongo pa Ambuya, uŵalindizge kwakuzika; reka kujikweŵeska chifukwa cha wakusakata mu nthowa yake, chifukwa cha munthu wakuchita viheni!

⁸Tuwako ku ukari, utaye kandundu! Reka kujikweŵeska, ichi chirongozge ku kwananga.

⁹Chifukwa ŵaheni ŵakadumulikanga; kweni wo ŵalindizga Ambuya ŵakaharanga charu.

¹⁰Kwaja kanyengo kamanavi, muheni kuti wakaŵangapo so cha; nanga uwonapo umampha pa malo ghake, iyo kuti wakaŵangapo cha.

¹¹Kweni ŵakuzika ndiwo ŵakaharanga charu, ŵakondwenge mu chimangu chikuru.

¹²Muheni wachitiya chiŵembu wakurunjika, ndi kumukukutiya minyu ghake;

¹³kweni Ambuya atimuseka muheni, pakuti awona kuti zuŵa lake likazanga.

¹⁴Ŵaheni ŵasoro lipanga, ŵatweŵa mauta ghawo, kuwiskiya pasi mukavu ndi musauchi, kubaya ŵakwenda kwakurunjika.

¹⁵Lipanga lawo likaserenga mu mtima wa ŵeneko, ndipo mauta ghawo ghakafyokanga.

¹⁶Tumanavi to wenato murunji nthwamampha kwakuruska vya uzari vya ŵaheni ŵanandi.

¹⁷Pakuti mikono ya ŵaheni yifyokenge; kweni Ambuya achirikizgenge ŵakurunjika.

¹⁸Ambuya aziŵa mazuŵa gha ŵakongorekwa, ndipo chihara chawo chikajaririyanga muyaya;

¹⁹mu nyengo ziheni kuti ŵakalengeskekanga cha, mu mazuŵa gha chilala iwo ŵagutenge.

²⁰Kweni ŵaheni ŵasoŵenge; ŵarwani ŵa Ambuya ŵenge nchipozwa chakunozga cha mauliska: ŵaparghang'ikenge nge ndi usi, ŵaparghang'ikiyenge kutali.

²¹Muheni wakongora, ndipo kuti wawezga cha, kweni wakurunjika ngwa chifundu ndipo wapaska.

²²Ŵakutumbikika ndi Ambuya ŵakaharanga charu, kweni ŵakutembeka ndi iwo ŵakadumulikanga.

²³Michapu ya munthu yituliya ku Ambuya, ndipo achirikizga yo iwo akondwa nayo mu menderu ghake;

²⁴nanga wangawa pasi, kuti wakawiyangapo limu cha, pakuti Ambuya atimukorere ndi janja lawo.

²⁵Ndenga muhurwa, ndipo sono ndakota; kweni ndilivi kuwona kuti murunji wasiyika pamwenga ŵana ŵake kupempha kurgha.

²⁶Nyengo zose ngwawezi ndi wakuteuliska, ndipo ŵana ŵake mbakutumbikika.

²⁷Tuwaniko ku kwananga, chitani umampha; viyo mukajaririyanga muyaya.

²⁸Chifukwa Ambuya atanja cheruzgu, kuti akasiyanga ŵatuŵa ŵawo cha. Ŵakurunjika ŵakasungirizgikanga muyaya, kweni ŵana ŵa ŵaheni ŵakadumulikanga.

²⁹Ŵakurunjika ŵaharenge charu, ndipo ŵakajanga paku cho muyaya.

³⁰Mlomo wa wakurunjika ukamba zeru, lilime lake likamba cheruzgu.

³¹Dangu laku Chiuta wake le mu mtima wake, michapu yake kuti yiteremuka cha.

³²Muheni wakhazga murunji, kupenja kumubaya.

³³Ambuya kuti amusiyenge mu nthazi yake cha, pamwenga kuzomerezga kuti wasuskike asani watoreke ku kweruzgika.

³⁴Lindizga Ambuya, yendanga mu nthowa yawo, ndipo akutumphuskenge kuhara charu; ukawonanga ŵachidumulika ŵaheni

³⁵Ndinguwona muheni wakujikuzga ukongwa, wakuthaza nge ndi muti wa mlanji waku Lebanoni.

³⁶Ndingwazijumphapo so, ndipo, awonani, iyo pengavi; nanga ndingumpenja, kweni kuti wangusanirika cha.

³⁷Thoŵani munthu wambura kalema, ndi lereskani wakunyoroka, pakuti ku munthu wa chimangu yiŵengeko mphapu yakuvuli.

³⁸Kweni wakwananga wakaparghang'ikiyanga limu; mphapu ya ŵaheni yikadumulikanga.

³⁹Utaski wa ŵarunji utuliya ku Ambuya; nchakudingang'amo chawo mu nyengo ya suzgu.

⁴⁰Ambuya atiwovya ndi kuŵapozomoska; atiŵapozomoska ku ŵaheni, ndi kuŵataska, chifukwa ŵadingang'a mwaku iwo.