Read gitonga Sumu 40 Bible Online

Sumu 40 - gitonga bible

Sumu 40

¹Ku wakumba mura. Sumu yaku Davidi Kulindizga ndingulindizga Ambuya; angutegherezga, anguvwa nkhuta yangu.

²Angundizuwuwa mu zenje lakofya, mu dongo la urambwi, angumika marundi ghangu pa jarawi, angukhozga menderu ghangu.

³Anguŵikamo sumu yifya mu mlomo wangu, sumu ya chitumbiku kwaku Chiuta widu. Ŵanandi ŵawonenge ndi ŵawopenge, ndipo ŵaŵikenge chigomekuzgu chawo mu Ambuya.

⁴Wakutumbikika ndi munthu yo Ambuya ndiwo chigomekezgu chake, yo kuti wang'anamukiya ku ŵakujikuzga cha, kwaku wo ŵapatukiya ku ŵachiuta ŵatesi!

⁵Ambuya, Chiuta wangu, mwandaniska nchitu zinu zakuziziswa ndi maghanaghanu ghinu gha paku ifwe; palivi nanga njumoza wakuyana namwe! Asani ndenga wakughataula ndi kughakamba, mphanyi ghaŵa ghanandi ghambura maŵerengeka.

⁶Sembe ndi mpasku kuti mutivikhumba cha; mwandipaska gutu lakuvwiska. Mpasku wakocha ndi mpasku wapa ulakwi kuti munguvipempha cha.

⁷Sono ndinguti, “Ehe, ndaza; mu chizinga cha buku mukurembeka vya paku ine.

⁸Ndikondwere kuchita khumbo linu, A Chiuta wangu; dangu linu le mukati mu mtima wangu.”

⁹Ndataulamakani gha likondwa gha utaski mu ungano ukuru; ehe, kuti ndikonge milomo yangu cha, Ambuya, imwe muziŵa.

¹⁰Chovyo cha utaski winu kuti ndachibisa mukati mwa mtima wangu cha, ndakamba gha kugomezgeka kwinu ndi chipozomosko chinu. Kuti ndabisa cha chifundu chinu ndi ukongorekwa winu ku unganu ukuru.

¹¹Ambuya mwe, rekani kukanizga lisungu linu paku ine, chisungusungu chinu ndi umagomekezgeka winu vindisunge muyaya!

¹²Pakuti mauheni ghambura maŵerengeka ghandizingirizga; mphurupuru zandisaniya, rekani nditondeka nanga nkhulereska; zaŵa zinandi kwakuruska sisi laku mutu wangu; mtima wangu chipoyo.

¹³Zomerani, Ambuya, kunditaska! A Chiuta, tinthimikani kundovya!

¹⁴Ŵachiti sono ndipo ŵatimbanizgikiye pamoza wo ŵapenja kukwamphuwa umoyo wangu; awezgeke kuvulindi awayulike wo ŵanweka kundipweteka!

¹⁵Muŵawondeske chifukwa cha uheni wawo wo ŵatindiwera kuti, “Aha, Aha!”

¹⁶Kweni wose ŵakupenja imwe ŵasekere ndi kukondwere mwaku imwe; wo ŵatanja chipozomosko chinu ŵakambenge mazuŵa ghose kuti, “Mbakuru Ambuya!”

¹⁷Kweni nge ndine, nde mukavu ndi musauchi; kweni ndipuuli Ambuya atindikumbuka. Imwe ndimwe chovyo changu ndi mtaski wangu; A Chiuta wangu, mungasweranga!