Read gitonga Sumu 45 Bible Online

Sumu 45 - gitonga bible

Sumu 45

¹Ku wakumba mura: pa Shoshanimu. Sumu ya ŵana ŵaku Kora. Sumu ya vyakwanja Ubwibwituska makani ghamampha mtima wangu; ndikamba ndi karonga makani yagha ndalemba; lilime langu lenge nchakulembe cha mlembi wazeru.

²Ndiwe wakutowa kwakuruska mu ŵana ŵa ŵanthu; wezi ukupungulikiya mu milomo yako; chifukwa cho Chiuta wakutumbika muyaya.

³Jimangiriye lipanga lako mu chiwunu, wa chilimbi we, mu unkhankhu ndi mu kuziza kwako!

⁴Mu kuziza kwako ugarenge ndi kupunda chifukwa cha uneneska ndi kuvikiriya urunji; janja lako lakurghiya likusambizge vinthu vyakofya!

⁵Mivwi yako njakuthwa mu mtima wa ŵarwani ŵa karonga; mitundu ya ŵanthu yawa pasi pako.

⁶Chitengo chako cha ufumu nchakujaririya muyaya ndi muyaya. Ndodo yinu yachifumu ndi ndodo ya ukongorekwa;

⁷mutanja urunji mutinkha uheni. Chifukwa cho Chiuta, Chiuta winu wakutondoni, ndipo wapunguliya paku imwe likondwa likuru kwakuruska ŵanyinu wose.

⁸Minjirira yinu yose yendi fungu la muro ndi chikasi cha chema ndi kasiya. Kutuliya mu zinyumba za ufumu za minyanga ya njovu virumbu vya malisinga vitukukondweskani;

⁹ŵana ŵanthukazi ŵa ŵakaronga ŵe mukati mu ŵamwali ŵinu ŵakutumbikika; karonga munthukazi watuma pa janja linu la marghe mu golide laku Ofiri.

¹⁰Vwanga, wa mwana munthukazi we, ghanaghana, tegherezga gutu lako; uruwe ŵanthu ŵako ndi nyumba ya ausu;

¹¹ndipo karonga wakhumbenge kutowa kwako. Umulambiye, pakuti iyo ndiyo mbuyako;

¹²ŵanthu ŵaku Turo ŵarondonge ulemu wako ŵachiza ndi vyawanangwa, ŵasambasi kwakuruska mukati mu ŵanthu,

¹³ŵazenge ndi chuma cha mtundu-mtundu. Mwana munthukazi wa karonga mu chipinda chake wavwarikika minjirira ya golide lakwengeka;

¹⁴mu vyakuvwara vya kujeduka warongozgeke ku karonga, pamoza ndi ŵamwali ŵake, ŵakwachimulinda.

¹⁵Warongozgeka ndi chimwemwe ndi kwangara wachisere mu nyumba ya chifumu ya karonga.

¹⁶Mu malo gha auskemwe mu kaŵanga ŵana ŵino mukawachitanga mafumu mu charu chose chapasi.

¹⁷Ndichitenge kuti zina lako likumbukikenge mu migonezi yose; chifukwa ichi mitundu yitumbikenge iwe muyaya ndi muyaya.