Read gitonga Sumu 49 Bible Online

Sumu 49 - gitonga bible

Sumu 49

¹Ku wakumba mura. Sumu ya ŵana ŵaku Kora Avwani ichi, mose mwa ŵanthu! Khazgani makutu, mose mwa ŵakuja mu charu,

²mose mwa ŵakuyuyuka ndi mwa ŵapachanya, mwa ŵasambasi pamoza ndi mwa ŵakavu!

³Mlomo wangu ukambenge makani gha zeru; marunguruku gha mtima wangu ghaŵenge gha zeru.

⁴Ndisendekiyenge gutu langu ku ntharika; ndifwatuwenge nthanthi yangu mu kumba kwa bangwe.

⁵Ndopiyengenji mu zinyengo za masuzgu, po uheni wa wakundikombo wandizunguliya,

⁶ŵanthu wo ŵagomezga mu uromba wawo, ndi kujikuzga mu unandi wa usambasi wawo?

⁷Kwakuneneska palivi munthu yo wangajiwombo, pamwenga kupaska kwaku Chiuta thumba lapa umoyo wake,

⁸pakuti thumba la umoyo wake nda mtengo wapatali; ndipo kuti lingakwaniriskika cha,

⁹kuti wajaririye muyaya, ndi wareke kuwona nuunda.

¹⁰Inya, wakawonanga kuti nanga mba vinjeru ŵatufwa, muzereza ndi muvumbwa ŵaparghang'ikenge kwakukozgana, ndi kusiliya ŵanyake uromba wawo.

¹¹Miunda yawo ndiyo mizi yawo muyaya, malo ghawo ghakujamo ku migonezi yose, nanga ŵanguzumbuwa vyaru kuŵa vyaku iwo ŵeneko.

¹²Munthu kuti wajaririya mukuzirwa kwake cha, wayana ndi nyama zo zitufwa.

¹³Iyi ndi nthowa yaku wo ŵendi chigomezgu chakupusa, nchigoti chaku wo ŵatijikondweska ndichigaŵa chawo.

¹⁴Nge ndi mberere ŵatemeke ku muunda; nyifwa yikaŵanga mliska wawo; ŵaruta ŵasikiya ku muunda, ndipo kawonekero kawo kakamaranga, muunda ukaŵanga muzi wawo.

¹⁵Kweni Chiuta wawombonge mzimu wangu ku muunda, chifukwa ndiyo wakandilondiyanga.

¹⁶Ungopanga cha po munthu wasambasa, po unkhankhu wa nyumba yake ukuwa.

¹⁷Chifukwa asani wafwa kuti wapingengepo kanthu cha; unkhankhu wake kuti ukamurondonga pavuli pake cha.

¹⁸Nanga watijiwona kuŵa wakukondwa, po weche ndi umoyo, ndipo nanga munthu waronde vitumbiku pakujichitiya umampha iyo mweneko,

¹⁹wakarutanga ku mgonezi wa awiske, kuti wakawonanga so ukweru cha.

²⁰Munthu kuti wajaririya mu kuzirwa kwake cha, wayana ndi nyama zo zitufwa.