Read gitonga Sumu 59 Bible Online

Sumu 59 - gitonga bible

Sumu 59

¹Ku wakumba mura; pa Ali-tashihete. Sumu yaku Davidi: wachituma Sauli, ŵangulindiya nyumba kundibaya Ndikwamphuweni ku ŵamawongo ŵangu, mwa Chiuta wangu, ndivikiriyeni ku ŵakundiyukiya.

²Ndipozomoskeni kwaku wo ŵachita utimbanizi, ndipo nditaskeni ku ŵanthu ŵanyota ya kudiska ndopa.

³Chifukwa, awonani, ŵaraliya umoyo wangu; ŵanthu ŵakofya ŵachome paku ine. Kuti nkhupuruka pamwenga kunanga kwangu cha, Ambuya,

⁴kuti nkhunanga kwangu cha, nanga ŵachimbiya ndi kujirongoso. Sokani, muzichindovya, ndipo wonani!

⁵Imwe, Ambuya Chiuta wa maŵanja, ndimwe Chiuta waku Yisraele. Yukani langani mitundu; rekani kusiyapo nanga njumoza wa ŵakuchita uheni mwakupusika.

⁶Ŵatuza mazulo ndi mazulo, ŵabwentha nge mba garu, ndi kuyingayinga mu muzi.

⁷Eŵa ŵekuwa, ŵabwebweta ndi milomo yawo, ŵatoroma ndi milomo yawo pakuti ŵaghanaghana kuti, “Njani yo wakativwanga?”

⁸Kweni imwe, Ambuya, muŵaskenge; imwe muyisekenge mitundu yose.

⁹A! Wanthazi zangu, ndimbiyenge marumbu kwaku imwe; pakuti imwe, A Chiuta, ndimwe linga langu.

¹⁰Chiuta wangu mu chifundu chake wakumanenge nane; Chiuta wangu wakandiwoneskanga kuthereskeka kwa ŵarwani ŵangu.

¹¹Rekani kuŵabaya, vinu ŵanthu ŵangu ŵangaruwa; muŵayungwiske ndi nthazi zinu, ndipo muŵawiskiye pasi, Ambuya mwe, nguru yidu.

¹²Ŵakoreke mu kujikuzga kwawo, chifukwa cha kunanga kwa milomo yawo, ndi mazu gha mu milomo yawo. Chifukwa cha kutemba ndi mautesi gho ŵarongoro,

¹³ŵamareni mu ukari winu, ŵamareni alinga kuti ŵareke kuwonekapo so, mwakuti ŵanthu ŵaziŵe kuti Chiuta wausa paku Yokobe, mpaka ku vigoti vya charu.

¹⁴Ŵatuza mazulo ndi mazulo, ŵabwentha nge mba garu, ndi kuyingayinga mu muzi.

¹⁵Ŵawuraura chifukwa cha kupenja kurgha, asani ŵareka kuguta ŵauruma.

¹⁶Kweni ine ndikoŵeriyenge nthazi zinu; ndikamburenge kukoŵere chifundu chinu ku mlenji. Chifukwa mwandiŵiya linga ndi chakudingang'amo mu, zuŵa la soka langu.

¹⁷Owe, Ŵanthuzi zangu, ndimbiyenge marumbu kwaku imwe, pakuti imwe, A Chiuta, mwaŵa linga langu, Chiuta yo watindirongo chanju chikuru.