Read gitonga Sumu 62 Bible Online

Sumu 62 - gitonga bible

Sumu 62

¹Ku wakumba mura; pa Yedutuni. Sumu yaku Davidi Kwaku Chiuta pe ulindizga chisisi mzimu wangu; utaski wangu utuliya kwaku iyo.

²Iyo pe ndiyo jarawi langu ndi chipozomosko changu, ndi linga langu; kuti ndisukuniskikenge weniukongwa cha.

³Mpaka zuŵanji mose imwe muyukiyenge pa munthu ndi kumufyo, nge nchimati chakulandara, nge ndi lisitu lakupasuka?

⁴Cho mupenja nkhumuwiskiya pasi, kumutuzga pa malo ghake gha ulemu. Mu kondwa ndi mautesi. Mukamba makani gha chitumbiku, kweni mu mtima winu mutimutemba.

⁵Mzimu wangu ulindizga chisisi mwaku Chiuta; chigomezgu changu ndiŵika mwaku iyo.

⁶Iyo pe ndi jarawi langu ndi utaski wangu linga langu; kuti ndisukuniskikenge cha.

⁷Chipozomosko changu ndi unkhankhu wangu vye paku Chiuta; ngwakuvikiriya wangu wanthazi; Chiuta nchakundingang'amo changu.

⁸Gomezgani mwaku iyo nyengu zose, mwa ŵanthu; muneniyeni masuzgu ghinu ghose, chifukwa ndiyo chakudingang'amo chidu.

⁹Ŵanthu ŵenge nkhamuvuchi ka waka, ŵanthu ŵa Charu ichi ŵalivi kuzirwa, pakuŵapima pa mweso ŵapepuka, mbapepu kwakuruska ka mvuchi.

¹⁰Rekani kuŵika chigomezgu chinu mu vyakuskoŵa; rekani kugomekezga muusambasi wakuchita kuphanga; asani usambasi ungandana, ungaŵikangako mtima wako cha.

¹¹Kwakuruska kamoza ndavwa Chiuta watiti: nthazi ze kwaku Chiuta;

¹²ndi kuti kwaku imwe, Ambuya, kwe chanju chikuru. Chifukwa imwe musuzula munthu kwakulingana ndi nchitu zake.