Read gitonga Sumu 66 Bible Online

Sumu 66 - gitonga bible

Sumu 66

¹Ku wakumba mura. Sumu Tumbikani Chiuta mwa ŵanthu mose ndi kukambura kwa chimwemwe!

²Mbiyani ku unkhankhu wa zina lake; perekani kwaku iyo unkhankhu wa rumbu!

³Nenani kwaku Chiuta, “Zakuziziswa nchitu zinu! Nthazi zinu zikuru ukongwa, reka ŵarwani ŵinu ŵakotama ndi chitenthe paurongo pinu.

⁴Charu chose chapasi chisopa imwe; ŵakoŵere marumbu kwaku imwe, ŵakoŵere marumbu ku zina linu.”

⁵Zaninga ndi muwone vyo Chiuta wachita: nchitu zake mukati mu ŵanthu zakuziziswa.

⁶Wakusanduska nyanja mtunda uyumu; ambuyafwe angwambuka msinji pasi. Kwenukuwa tingwangara pa chifukwa chaku cho chinguchitika;

⁷ngwa kuwusa muyaya ndi mazaza ghake, maso ghake ghe pa mitundu ya ŵanthu. Ŵakutwanga ŵareke kujitumphuska paku iyo!

⁸Tumbikani Chiuta widu, mwa mitundu yose; rumbu linu livwike.

⁹Watisunga ifwe mukati mu ŵamoyo, ndipo kuti watizomerezga kuwa cha.

¹⁰Imwe mwatiŵika pa mweso, A Chiuta; mo siliva watengulikiya ndi moto ndimo imwe namwe mwatese.

¹¹Mwatiwizga mu chiŵana, mukutinyekezga ndi katundu mzitu pa misana yidu.

¹²Munguchitiska ŵanthu kukwera pa mitu yidu; tinguporota mu moto ndi mu maji; ndipo sono mwatitore ku malo gha kudekha.

¹³Ndizenge ku nyumba yinu ndi mipasku yakocha; ndikaperekanga kwaku imwe cho ndingupangana.

¹⁴Ndikupaskeninga cho ndingukamba kuti ndiperekenge, penipo ndenga musuzgu.

¹⁵Ndikaperekanga kwaku imwe mipasku yakocha ya vyakututuŵa, pamoza ndi chema cha ŵabira. Ndiperekenge sembe ya zinkhuzi ndi zimbuzi.

¹⁶Zaninga ndi muvwe, mose mwa ŵakopa Chiuta, ndipo nditaulenge vyo wandichitiya.

¹⁷Ndinguliriya kwaku iyo, ndingumurumba ndi lilime langu.

¹⁸Asani ndiŵenge wakuphwere viheni vyangu mukati mu mtima, mphanyi Ambuya kuti angundivwa cha.

¹⁹Kweni kwakuneneska Chiuta wandivwa; wategherezga ku kuromba kwangu.

²⁰Ndirumba Chiuta, chifukwa rombu langu kuti wakulipata cha, pamwenga kuwezge vuli chifundu chake paku ine!