Read gitonga Sumu 69 Bible Online

Sumu 69 - gitonga bible

Sumu 69

¹Ku wakumba mura; pa Shoshanimu. Sumu yaku Davidi Nditaskeni, A Chiuta! Chifukwa maji ghakwera ghe mukhosi.

²Ndibira mu urambwi wakuzoroke, ndipo palivi charu chiyumu chakumapo; ndafika mu ndimba ya maji, ndipo zandi watindikukurwiska.

³Ndavuka ndi kuliriya chovyo, pa khosi pangu paŵaŵa. Maso ghangu ghachita chizgezge pakulereze Chiuta wangu.

⁴Wo ŵatinditinkha waka kwambura chifukwa mbanandi ukongwa kwakuruska sisi laku mutu wangu mbanthazi ukongwa wo ŵakhumba kundiparghang'a, wo ŵakamba kwautesi paku vyo ŵaŵiya ŵarwani ŵangu. Wandichitiska kuti ndiwezge vinthu vyo kuti ndinguba cha.

⁵Uheni wangu, A Chiuta, kuti ukubisika cha kwaku imwe; imwe muziŵa kupusa kwangu!

⁶Wo ŵagomekezga mwaku imwe ŵareke kulengeskeka chifukwa changu, Ambuya Chiuta wa maŵanja! Wo ŵapenja imwe ŵareke kuchitiskika soni chifukwa changu, mwa Chiuta waku Yisraele!

⁷Pakuti chifukwa chakuimwe ine ndapinga sunjizgu, soni za benekere chisku changu.

⁸Ndaŵa nge ndi mlendo ku ŵabali ŵangu, nge ngwa mtundu ku ŵana ŵa ama.

⁹Kujipereka kwangu ku nyumba yinu kukole nge ndi moto mukati mwangu, ndipo matozu gha ŵakutoza imwe ghawa paku ine.

¹⁰Pondingujiyuyuwa ndi kufunga, chingunditore kusunjizgika ku ŵanthu.

¹¹Po ndinguvwara vivwalo vya maliro, ndinguŵa nge nchakusekeska kwaku wo.

¹²Ŵakamba gha paku ine mu zinthowa, ndipo ndaŵa sumu za ŵakuloŵe.

¹³Kweni ine, ndirombenge kwaku imwe, Ambuya. Panyengo yo mwasankha, A Chiuta, chifukwa cha chifundu chinu chikuru, mundamuke, chifukwa musunga phanganu linu la kutaska.

¹⁴Nditaskeni ku kuzoroke mu urambwi; ndikwamphuweni ku ŵarwani ŵangu, ndiku ndimba ya maji.

¹⁵Wareke zandi kundikukurwiska; ndimbazireke kundibizga, ndipo muunda ureke kundimeza.

¹⁶Chifukwa cha umampha wa chifundu chinu, Ambuya, mundamuke; mu chisungu-sungu chinu chikuru, ng'anamukiyani kwangu.

¹⁷Rekani kujibisa ku mteŵeti winu; ndaŵa musuzgu yikuru mundamuke sono!

¹⁸Zani kwangu munditaske; ndipozomoskeni ku ŵamawongo ŵangu.

¹⁹Imwe muziŵa kutozeka kwangu, mo ndalengeskeke ndi kuyuyulika; ŵarwani ŵangu wose mutiŵawona.

²⁰Kusunjizgika kwaswa mtima wangu, ndaguluruka nthazi. Ndingugomezga kuti ndiwonenge ŵalisungu, kweni kwengavi nanga njumoza; ndalereze ŵakusangaruska, kweni kuti ndaŵasaniya cha.

²¹Po ndenga wanja, ŵangundiliska nduru, po ndenga wanyota, ŵangundimweska vinyo wakuŵaŵa.

²²Magome ghawo paurongo pawo ghaŵaŵiye chiŵana; madghera ghawo gha sembe ghaŵaŵiye chikwiriki.

²³Maso ghawo ghaburumutizgike, alinga kuti ŵareke kulereska; ndipo viunu vyawo mugweduwe rutaruta.

²⁴Ukari winu punguliyani paku iwo, ndipo ufyu wa kandundu kinu uŵasaniye.

²⁵Malo ghawo ghakujamo ghaŵe mapopa, paulevi nanga njumoza wakuja mu mahema ghawo.

²⁶Pakuti ŵatimusuzga yo imwe mwakoso, ndipo yo imwe mwamupweteka, iwo ŵatimuyuzga so kwakuruska.

²⁷Sazgiyanipo kulanga pa kulangika kwawo; ŵareke kuŵa ndi chigaŵa mu utaski winu.

²⁸Mazina ghawo ghasisitike mu buku la ŵamoyo; ŵareke kulembeka pamoza ndiŵanthu ŵinu.

²⁹Kweni ine nde wakusuzgika ndi wakuvwa urwirwi; A Chiuta, zomerani kuti utaski winu, unditumphuskiye pachanya!

³⁰Ndirumbenge zina laku Chiuta ndi sumu; ndithamikenge ukuru wake mu kuwonga.

³¹Ichi chikakondweskanga Ambuya kwakuruska mpaskuwa ng'ombe, pamwenga kupereka nkhuzi yose yamphumphu.

³²Sono ŵakukandirizgika ŵachioni ichi ndi ŵakondwe; mwaŵakupenja Chiuta, mitima yinu yisisipuskike.

³³Ambuya atuvwa ŵasauchi, ndipo kuti apata wo mbawo cha nanga ŵaŵe mu kumangika.

³⁴Rumbani Chiuta, kuchanya ndi pasi, zinyanja ndi vyose vyakwenda mwenimo!

³⁵Chifukwa Chiuta wakataskanga Zioni, ndi kuzenga so misumba yaku Yuda; ŵanthu ŵake ŵakajanga mwenimo ndi kuhara charu;

³⁶mphapu ya ŵateŵeti ŵake yikachiharanga, ndipo wose ŵakwanja iyo ŵakajangamo.