Read gitonga Sumu 72 Bible Online

Sumu 72 - gitonga bible

Sumu 72

¹Sumu yaku Solomoni. Rombu lapa Karonga A Chiuta, sambizgani karonga kweruzga mu urunji winu, vyeruzgu vinu musangani nayo,

²alinga kuti weruzgenge ŵanthu ŵinu mu uneneska, ndi kuwunganiska ŵasauchi mu urunji.

³Charu chikondwe chisakatiskike; chiziŵe wo mburunji.

⁴Karonga weruzgenge ŵakavu mu urunji; wawovyenge ŵakusauka, ndi kuthereska wo ŵati ŵasuzga!

⁵Ŵanthu ŵinu ŵasope imwe po posi dazi liŵala, pose po mwezi upaska kuŵala kwake, ku migonezi yose.

⁶Karonga waŵe ulaka nge ndimo vuwa yitung'iya pa minda, nge ndimo vuwa yiwazgiya pa charu.

⁷Urunji usapatiye mu mazuŵa ghose gha umoyo wake, ndipo usakati ulutiriye pose po mwezi uŵaliya.

⁸Wausenge kutuliya ku nyanja; mpaka ku nyanja; kutuwa ku msinji Efrate mpaka ku vigoti vya charu.

⁹Ŵanthu ŵamu bozwa ŵangwadenge paurongo pake; ŵarwani ŵake ŵagonenge mu fuvu.

¹⁰Ŵakaronga ŵaku Tarshishi ndi ŵarau virwa ŵakaperekanga mipasku; ŵakaronga ŵaku Sheba ndi Seba ŵakamuziyanga ndi mithulu.

¹¹Ŵakaronga wose ŵamulambiyenge; ndipo ŵamitundu wose ŵakamuteŵetiyanga iyo!

¹²Wapozomoska msauchi yo waliriya kwaku iyo, ŵakavu ndi wo ŵalivi ŵakuwovya.

¹³Wafwiya lisungu wakutomboroka ndi mukavu; ndi kutaska maumoyo gha ŵasauchi.

¹⁴Wati ŵawombo ku kukandirizgika ndi ku mahomwa; ndopa zawo zakuzirwa ukongwa mu maso ghake.

¹⁵Waŵe ndi utali karonga! Wapaskike golide waku Sheba, marombu ŵamurombiyenge kwambura kurekezga; ndipo vitumbiku vyaku Chiuta viŵe paku iyo nyengo yose!

¹⁶Mu charu muŵe kurgha kwakuzara; mithunthu yiburumutizgike ndi vipasi, vyandane nge ndimo viliri ku Lebanoni; misumba nayo yizaze ndi ŵanthu, nge ndimo uteka uliri mu dondo.

¹⁷Zina lake lijaririye muyaya, mbiri yake yirutiliyenge mo liliri lumwi. Yimurumbenge mitundu yose, ŵanthu wose ŵapemphe Chiuta kuti waŵatumbike, nge ndimo watumbikiya karonga.

¹⁸Atumbikike Ambuya, Chiuta waku Yisraele, yo yija wachita vyakuziziswa.

¹⁹Litumbikike zina lake la unkhankhu muyaya; unkhankhu wake uzaze mu charu chose, Ameni! Ameni!

²⁰Uwu mbumari wa marombo ghaku Davidi mwana waku Jese.