Read gitonga Sumu 73 Bible Online

Sumu 73 - gitonga bible

Sumu 73

¹Sumu yaku Asafi Nadi Chiuta ngwamampha kwaku Yisraele, kwaku wo mbakutowa mu mtima.

²Kweni ine ndenga pafupi kuwa pasi; marundi ghangu ghenga pafupi kuteremuka.

³Chifukwa ndinguchita sanji ndi ŵakujikuzga, po ndinguwona kuti ŵaheni ndiwo ŵasakata.

⁴Kuti ŵakoreka ndi urwirwi cha, mbanthazi ndi ŵa umoyo wamampha.

⁵Kuti ŵakomwa nge mbanthu ŵanyake cha; ndipo kuti ŵendi masuzgo mo ŵaliri ŵanyake cha.

⁶Viyo ŵavwara kujikuzga ulaka ndi pheska; ndi chiwawa ulaka ndi munjirira.

⁷Mitima yawo yidiska mphurupuru, ndipo maghanaghano ghawo ngakuzaza ndi nthowa za uheni.

⁸Ŵawera ŵanyawo ndi kukamba vya ubereŵeza; mbakujikuzga ndipo ŵarongoro ghakukandirizga ŵanyawo.

⁹Ŵakambiya uheni Chiuta kuchanya, ndipo ŵapereka marangu gha nkhaza ku ŵanthu mu charu chapasi.

¹⁰Mwakuti nanga mbanthu ŵaku Chiuta ŵang'anamukiya kwaku iwo; ndipo ndi mwamphu wose ŵavwana mwaku chose cho ŵakamba.

¹¹Sono ŵatiti, “Chiuta kuti wakaziŵanga cha! Wapachanya Limu kuti wakachibowozganga cha!”

¹²Awonani, viyo ndimo ŵaliri ŵaheni; ŵenavyo vinandi ndipo visazgikiyapo so vinyake nyengo ndi nyengo.

¹³Kumbi nkhwaŵaka viyo, kuti ndajisunga wambura kalema, manja ghangu ngakuphotoka ku kwananga?

¹⁴A Chiuta, mwandikweŵeska zuŵa lose; ndipo mwandilanga mlenji ndi mlenji!

¹⁵Asani ndingurongoro vinthu nge ndi ivi, mphanyi ndatinge ndiŵenge mutesi ku ŵanthu ŵinu.

¹⁶Viyo ndingwesakwa unonono kuti ndiwemo ichi, nanga chenga chizitu kwakuruska,

¹⁷mpaka penipo ndingusere mu nyumba yinu yakupaturika, ndipo ndikuwamo cho chikachitikanga ku ŵaheni.

¹⁸Nadi mukuŵaŵika mu malo ghakuteremuka; ndi kuŵawiskiya kupharghaniko!

¹⁹Ruŵi-ruŵi ŵabwanganduka; ŵasikiya ku umari wakofya!

²⁰Ambuya, alingana nge ndi loto lo ndi mlenji lithaŵa; uchiyuka uruwa mo maloto ghanguŵiya.

²¹Po mzimu wangu unguŵaŵa, ndi marunguruku ghangu ghangulasika;

²²ndenga wakupusa, ndipo kuti ndinguwamo cha; ndinguchitange ndi nyama pa maso pinu.

²³Kweni ndipuuli ine nde pamoza namwe nyengo yose, imwe mutindiko pa janja.

²⁴Mutindirongozga ndi chirunguchizgu chinu, ndipo pa umari mwa mkundironde ndi chitumbiku.

²⁵Kumbi nde ndi yani kuchanya kweni imwe pe? Ndipo po ndendi imwe, kwe yani so munyake mu charu chapasi?

²⁶Mtima wangu ndi liŵavu langu vingagongowa, kweni Chiuta ndi nthazi yangu; ndiyo pe yo ndikhumba muyaya!

²⁷Chifukwa awonani, wose wo wapata imwe ŵakafwanga, ndipo mukaparghang'anga wose wo ŵalivi chigomekezgu mwaku imwe.

²⁸Kweni kwaku ine, awa, naku nkhuzirwa kuŵa pafupi ndi Chiuta: Mwa Ambuya Chiuta ndisaniya kuvikirika, alinga kuti nditaule nchitu zinu zose.