Read gitonga Sumu 75 Bible Online

Sumu 75 - gitonga bible

Sumu 75

¹Ku wakumba mura; pa Ali-tashihete. Sumu yaku Asafi Titumuwongani, A Chiuta, titumuwongani. Titaula ndi ukuru winu; ndi kukamba milimu yinu yakuziziswa yo mwachita!

²“Ndamika nyengo ya kweruzga,” atiti Ambuya, “ndipo nderuzgenge kwakunyoroka.

³Nanga charu ndi vyose vyakujamo vimbininika, ine ndikakhozganga viŵanja vyake.”

⁴Ndikamba ku ŵakujikuzga, “Mungajikuzganga cha,” ndi ku ŵaheni, “Mungalongonga nthazi zinu cha;

⁵nditiŵakambiya kuti ŵareke kujiŵikamo, rekani kumika makhosi ghinu.”

⁶Cheruzgu kuti chikatuliyanga ku vuma pamwenga ku zambwe cha, ku nkhonde pamwenga ku malaŵi cha.

⁷Kweni ndi Chiuta yo wachita cheruzgu, kusiskiya pasi ŵanyake, ndi kukwezge ŵanyake pachanya.

⁸Chifukwa mu janja la Ambuya mwe chandi; chakuzaza ndi vinyo mufya, wanthazi ukongwa; akampunguwanga, ndipo yose ŵaheni ŵakamwangapo; ŵakamwanga yose mpaka kanthoni ka kumariya.

⁹Kweni ine kuti ndikarekezganga cha kukamba ndi vyaku Chiuta waku Yakobe, pamwenga kukoŵere marumbu kwaku iyo.

¹⁰Wabwanganduwenge nthazi yose ya ŵaheni, kweni nthazi ya ŵakurunjika yikakuzgikanga.