Read gitonga Sumu 89 Bible Online

Sumu 89 - gitonga bible

Sumu 89

¹Sumu yaku Etani mu Ezrahi Ndimbiyenge vya chanju chinu chakufikapo muyaya, Ambuya mwe; ndi mlomo wangu nditaulenge ukongorekwa winu ku migonezi yose.

²Ndiziŵa kuti chanju chinu nchakujaririya muyaya, ukongorekwa winu wakhozgeka nge ndi mtambo.

³Imwe munguti, Ndachita phanganu ndi munthu yo ndasankha; ndarapa kwaku Davidi mteŵeti wangu;

⁴“Wa mphapu yako ndiyo wakaŵanga karonga muyaya; ndikasunganga ufumu wako ku migonezi yose.”

⁵Machanya gharumba vyakuziziswa vinu, Ambuya, mu ungano wa ŵakupaturika ŵatumba vya ukongorekwa winu!

⁶Kuchanya kulivi wakuyana ndi imwe, Ambuya; kulivi nanga njumoza mu ŵachita wakulingana namwe,

⁷Chiuta wakopeka mu upu wa ŵakupaturika, mura ndi wakofya pachanya paku wose ŵakumuzunguliya.

⁸Ambuya Chiuta wa maŵanja, njani wendi mazaza nge ndigho mwenagho imwe, Ambuya? Mwe ŵamagomekezgeka mu vinthu vyose, A Chiuta.

⁹Imwe muwusa pa nyanja za kulimba muchetamiska ukari wa mayigha ghake.

¹⁰Munguphwanya njoka ya Rahabu ndi kuyibaya; ndi nthazi zinu zikuru munguthereska ŵarwani ŵinu.

¹¹Nginu machanya, charu chapasi nacho nchimu; charu ndi vyose vya mwenimo, ndinwe mukuvilenga.

¹²Nkhonde ndi malaŵi, ndimwe mukuvijarika; phiri la Taboro ndi phiri la Hermoni ghakoŵere imwe, ndi kukondwa.

¹³Ndimwe wa nthazi zikuru! Ngakuru mbwenu mazaza ghinu!

¹⁴Ufumu winu ukujarikika pa urunji ndi cheruzgu; chanju ndi ukongorekwa vye mu chitu zinu zose.

¹⁵Ŵakukondwa mbanthu wo ŵasopa imwe ndi zisumu, wo ŵatenda mu ukweru wa chisku chinu,

¹⁶chifukwa chinu ŵatangara zuŵa lose, ŵarumba imwe chifukwa cha umampha winu.

¹⁷Mutitipaska maupundi ghakuru; mu ulemu winu ndimu tiruskiya,

¹⁸chifukwa mukusankha wakutivikiriya; imwe Mtuŵa Yumoza waku Yisraele, mukutipaska karonga widu.

¹⁹Mu chiwona, mazuŵa ghamwaka, mungukamba ku ŵateŵeti ŵinu ŵamagomekezgeka kuti, “Ndaŵika chifuku pa msilikali wangu walumbiri; ndapereka chitengo ku yumoza wakusankhika mu ŵanthu.

²⁰Ndatando mteŵeti wangu Davidi, ndamuchita kuŵa karonga winu;

²¹ndipo janja langu likaŵanga paku iyo nyengo yose, janja langu likamupaskanga nthazi.

²²Ŵarwani ŵake kuti ŵakamupundanga cha, ŵaheni kuti ŵakamuthereskanga cha.

²³Ndikaphwanyanga ŵakupindikana ŵake ndi kubaya wose wo ŵatimutinkha.

²⁴Ndikamwanjanga ndi kumuvwiya nyengo yose; ndimupundiskenge mazuŵa ghose.

²⁵Ndirutilizgenge ufumu wake kutuliya kunyanja ya Meditereniani mpaka ku msinji wa Efrate.

²⁶Wakakambanga nane, ‘Imwe ndimwe Ada ndi Chiuta wangu; ndimwe muvikiriyi wangu ndi mtaski wangu.’

²⁷Ndikamusanduskanga mwana wangu wa umwali, wapachanya pa ŵakaronga wose.

²⁸Ndimusungiyenge phanganu langu muyaya, ndipo dangu langu ndi iyo likakhozgekanga.

²⁹Ndikamiskanga mphaka yake muyaya ndi chitengo chake nge ndi mazuŵa gha kuchanya.

³⁰Kweni asani mphapu yake yirekenge kuvwiya dangu langu, ndikureka kuja kwakulingana ndi langulu langu;

³¹asani ŵakaswanga malangulu ghangu ndi kureka kusunga marangu ghangu,

³²penipo ndipo ndikaŵalanganga chifukwa cha uheni wawo; ndikaŵakwechuwanga chifukwa cha kunanga kwawo.

³³Kweni kuti nkhalekanga cha kumwanja Davidi, pamwenga kutondeka kusunga phanganu langu paki iyo.

³⁴Phanganu langu kuti ndikaswanga cha, nanga nkhusinthiya panyake masu gho ghakutuwa mu mlomo wangu.

³⁵Kamoza pe mbwenu ndarapiya pa zina langu lituŵa: Kuti ndikaruwanga Davidi cha!

³⁶Mbeu yake yikajaririyanga muyaya, ndipo ndikasunganga ufumu wake po pose lumwi liŵaliya.

³⁷Ukakhozgekanga nge ndi mwezi nge ndi kaboni wamagomekezgeka kuchanya.”

³⁸Kweni sono mwakaripiya karonga yo; mwamuthawa ndi kumupata.

³⁹Mwazimwa phanganu ndi mteweti winu, chifuku chake mwataya mu fuvu.

⁴⁰Mwawiskiya pasi vimati vya msumba wake, malinga ghake mwaghasanduska mapopa.

⁴¹Wose ŵakujumphapo ŵatimuskowa waŵa chitozeru ku ŵakuzengezgana wake.

⁴²Mwapaska upundi ku ŵarwani ŵake, ŵakupindikana ŵake mwaŵakondweska.

⁴³Vidya vyake mwavisanduska vyawakawaka, ndipo mwamuthereska mu nkhondo.

⁴⁴Imwe mwatuzgapo ndodo yake ya chifumu, chitengo chake mwawiskiya pasi.

⁴⁵Mwamuchitiska unkhongewe nyengo yake yenge yindafikepo, ndipo mwamuvwarika soni.

⁴⁶Mpaka zuŵanji, Ambuya? Kumbi mukajibisanga muyaya? Mpaka zuŵanji ukari winu ukawochanga nge ndi moto?

⁴⁷Kumbukani, Ambuya, mo uliri ufupi umoyo wa munthu; kumbukani kuti mukulenga ŵanthu wose dongo la waka!

⁴⁸Njani wangaŵa wamoyo kureka kufwa? Njani munthu yo wangajitaska ku nthazi ya muunda?

⁴⁹Ambuya, chaya pani chanju chinu chikuru cha mazuŵa ghakale, ghepani mapanganu gho mungupangana ndi Davidi?

⁵⁰Mwaruwiyanji, suzgu yaku ndamteŵeti winu Ambuya; mo ndapingiya mu chifuŵa changu sunjizgo la ŵanthu ŵaheni;

⁵¹lenilo ŵakupindikana ŵinu ŵasuzga nalo karonga winu wakusankhika, Ambuya! Ŵatimuyuzga kose kweneko ŵatenda.

⁵²Tiyeni titumbike Ambuya muyaya! Ameni! ndi Ameni!