Read gitonga Sumu 92 Bible Online

Sumu 92 - gitonga bible

Sumu 92

¹Sumu yapa Sabata Nkhwamampha kupereka viwongo ku Ambuya, kukoŵere marumbu ku zina linu, mwa Ŵapachanya Limu;

²kutaula chanju chinu chakufikapo mlenji ndi mlenji, ndi ukongorekwa winu usiku ndi usiku,

³pa chirumbu cha malisinga ndi kaligu, pakumba ndi bangwi.

⁴Nchitu zinu zanthazi, Ambuya, zitindikondweska; pa chifukwa chaku vyo mwachita nditumba ndi chimwemwe.

⁵Nawu mbukuru wa milimu yinu, Ambuya! Ngandimba ukongwa maghanaghano ghinu!

⁶Munthu muzereza wangaghaziŵa cha, wakupusa kuti wangawamo cha;

⁷nanga ŵaheni ŵakuwe nge mbuteka, nanga wose ŵakuchita utimbanizi ŵasakate; ndipuuli mbakutemeke ku pharghaniko la muyaya.

⁸Kweni imwe, Ambuya, mwe apachanya muyaya.

⁹Pakuti, ehe, ŵakupindikana namwe, Ambuya, ehe, ŵarwani ŵinu, ŵakamaranga; wose ŵakutata utimbanizi ŵakaparghang'ikanga.

¹⁰Imwe mwandichitiska kuŵa wanthazi nge ndi njati; ndipo mwanditumbika ndi malikondwa.

¹¹Maso ghangu ghalereska kuwa pasi kwaŵarwani ŵangu; makutu ghangu ghavwa kubwanganduka kwa ŵakundiyukiya.

¹²Ŵakurunjika ŵakatipitiyanga nge ndimuti wa kanchindwi, ŵakakuwanga nge ndimilanji yaku Lebanoni.

¹³Ndi miti yakupandika mu nyumba ya Ambuya, wo ŵatipitiya mu kasopi waku Chiuta widu.

¹⁴Ŵapasa upasiya vipasi ndi mu ukhongwe wawo, nyengo yose mbakubiriŵira ndi ŵanthazi.

¹⁵Mwakuti kuwoneke kuti mbakurunjika Ambuya; ndiwo jarawi langu, ndipo mwaku iwo mulivi kubende.