Read gitonga Nthanthi 1 Bible Online

Nthanthi 1 - gitonga bible

Nthanthi 1

¹Nthanthi zaku Solomoni, mwana waku Davidi, karonga waku Yisraele:

²Alinga ŵanthu ŵaziŵe zeru ndi chisambizgu, kuwamo mazu gha vinjeru,

³kulonde chisambizgu mu machitidu gha zeru urunji, cheruzgu, kusunga dangu.

⁴Alinga kuti ŵakuzimbwa ŵapaskike zeru zeru ndi maghanoghano ku ŵampupuka,

⁵munthu wa zeru nayo wavwe ndi wakuskiyeko masambiro, ndi munthu wakuwamo wapenje umisili,

⁶kuwamo nthanthi ndi kang'anamulidu kake, mazu gha ŵazefu ndi vyakuzizika vyawo. Munthu kuti wazomerezga wakwananga kuti wamurongozgi cha

⁷Kopa Ambuya ndiku kwamba kwa zeru; ŵakupusa ŵayeya chinjeru ndi visambizgu.

⁸Yivwa wa mwana wangu chisambizgu cha ausu; ndipo ungakananga kusambizga kwa anyoko;

⁹pakuti ivi ndi mwenera wa mutu wako ndi mukanda wa khosi lako.

¹⁰Wa mwana wangu, asani ŵaheni ŵatukunyenga ungazomelanga cha.

¹¹Asani watiti, “Zanga pamoza nafwe, tikakhazge kudiska ndopa, tikakhazgi ŵambura kafukwa,

¹²tiŵameze ŵamoyo uli ndi muunda, ŵamphumphu, uli ndi wo ŵasikiya mu zenje;

¹³tikasaniyanga chuma chose cha mutengo ukuru, tikazazanga nyumba zidu ndi vyakuskoŵa;

¹⁴ubatikana nafwe pamoza ifwe tose tikaŵanga ndi chikwama chimoza.”

¹⁵Wa mwana wangu, reka kwenda pamoza nawo mu nthowa tuzgako rundi lako ku nthowa zawo;

¹⁶pakuti marundi ghawo ghachimbiriya ku uheni, ndipo ŵatinthimikiya kwachidira ndopa.

¹⁷Pakuti chrepa chithyika kwa waka mu maso gha kayuni ke kose,

¹⁸kweni ŵanthu yaŵa ŵakhazga ndopa zaŵeneko, ŵabisamiya ma umoyo gha ŵeneko,

¹⁹umu ndimu zilili nthowa zaku wose ŵeniwo ŵasakatiya mu mbanda zituzgapo umoyo wa ŵeneko ŵa vinthu.

²⁰Chinjeru chilongo mu museu, mu misika chisoska mazu ghake;

²¹pa vimati pachanya chiliya pakweru; pa kuserere pa malikomo gha msumba chirongoro,

²²“Mpaka zuŵanji, mwaŵana, mwanjenge vya chiwanamana? Mpaka zuŵanji ŵakutafura ŵakakondwerenga mu kutafura kwawo ndi ŵakupusa kutinkha zeru?

²³Phwereni kuchenjezga kwangu, ehe, ndikapunguliyanga maghanughanu, ghangu kwaku imwe; ndikaziŵiskanga mazu ghangu kwaku imwe.

²⁴Chifukwa ndingudana ndipo mungukana kundivwa, ndatambaluwa janja langu ndipo palivi yumoza yo waphweleko,

²⁵ndipo mwakana fundu zangu zose, ndipo mulivi kuronde nanga ndimoza chenjezgu langu,

²⁶nani so ndikasekanga pa suzgu yinu ndikahoyanga penipo mukawopanga,

²⁷penipo mantha ghatumupwetekani, uli ndi lirondo, ndipo suzgu yinu yichiza uli ndi kavuluvulu, penipo suzgu yikuru ndi chitima vyaza paku imwe.

²⁸Pa nyengo yo ŵakadananga kwaku ine; kweni kuti ndamukenge cha: ŵakandipenjanga kwarwana kweni kuti ŵakandibowozganga cha.

²⁹Chifukwa ŵangutinkha zeru ndipo kuti ŵangusankha kopa Ambuya cha,

³⁰ŵangukana kuronda nanga njimoza ya fundu zangu, ndipo ŵanguyuyuwa chenjezgu langu,

³¹chifukwa cho ŵakarghanga chipasi cha nthowa yawo ndi kuŵa ŵakuguta ndi fundu za ŵeneko.

³²Pakuti ŵanamana ŵabayika ndi nthowa yawo yachiwerevuli, ndipo kujikhorwa kwaŵakupusa kutuŵananga ŵeneko;

³³kweni mweniyo wategherezga kwangu wakajanga pakukho ndipo wakaŵanga pa uyuyu, wambura kutenthema chiheni.”