Read gitonga Nthanthi 10 Bible Online

Nthanthi 10 - gitonga bible

Nthanthi 10

¹Nthanthi zaku Solomoni. Mwana wazeru wakondwereska awiske, kweni mwana wakupusa nchitima ku anyina.

²Vyumba vyakusakatika ndi mphulupulu kuti vitanduwa kanthu cha, kweni urunji utaska ku nyifwa.

³Ambuya kuti azomerezga kufwa ndi nja cha, kweni aziŵanizga kunweka kwa wamphulupulu.

⁴Janja lakutomboloka lipaska ukavu kweni janja la warwana liremereska.

⁵Mwana yo wawunjika mu chihanya ngwazeru, kweni mwana mweniyo wagona pa chivuna walengeska.

⁶Vitumbiku vye pa mutu wa murunji kweni mlomo wa wamphulupulu ubisilizga ndeu.

⁷Chikumbusku cha murunji ndi thumbiku, kweni zina la wamphulupulu likavundanga.

⁸Wazeru mu mtima wakaphwerenga marangu, kweni wakupusa wavibwetu wakanangikanga.

⁹Mweniyo watenda mu ukongorekwa watenda ndi kuvikirika kweni wanyongoroska nthowa zake wabowozgekenge.

¹⁰Mweniyo wakupizga jiso lake watamba suzgu, kweni mweniyo wasuska ndi kukhwima mtima wachitika chimangu.

¹¹Mlomo wa murunji nchisima cha umoyo, kweni mulomo wa wamphulupulu ubisilizga ndeu;

¹²Kutinkha kuyuska homwa, kweni chanju chivimba vifukwa vyose.

¹³Pa mlomo waku yo ngwakuwamo pasanirika zeru, kweni ndodo nja pa msana paku yo walivi chinjeru.

¹⁴Ŵanthu ŵazeru ŵasunga kuziŵa, kweni kubwebweta kwa wakupusa kutuza ndi phasulu pafupi.

¹⁵Chuma cha munthu muromba ndi msumba wake wakukho, usauchi wa ŵakusauka ndi phasulu lawo.

¹⁶Mphoto ya wakurunjika yirongozge mu umoyo, chanduwu cha wa mphulupulu nkhu uheni.

¹⁷Mweniyo waphwere kusambizga we munthowa yaku umoyo, kweni mweniyo wakana kususkika wapulukiya.

¹⁸Mweniyo wabisirizga kutinkha wendi milomo yitesi, ndipo mweniyo watundula kwa utesi ngwa kupusa.

¹⁹Asani mazu nganandi, kusovya kuti kutuwa patali cha, kweni mweniyo wasunga milomo yake ngwazeru.

²⁰Lilime la murunji ndi siliva wakusankhika. Muwongo wa wamphurupuru utenere kamanavi.

²¹Milomo ya ŵakurunjika yihiŵa ŵanandi, kweni ŵakupusa ŵafwiya kuwura chinjeru.

²²Chitumbiku cha Ambuya chisakatiska, ndipo kuti asazgiyako chitima cha kwaku cho.

²³Kuchita uheni kwenge ndi saza ku wakupusa kweni kachitidu kamampha kakondweska munthu wa vinjeru.

²⁴Chenicho watopa wamphulupulu chikazanga paku iyo, kweni chenicho wanweka murunji chikapaskikanga.

²⁵Asani lilondo lakapo wamphurupuru waŵapo so cha, kweni murunji wajinthika muyaya.

²⁶Mo wachitiya vinigara ku minyu, ndi usi ku maso, viyo ndimu walili mukata kwaku wo ŵatimutuma.

²⁷Kopa Ambuya kutandaniska umoyo, kweni virimika vya wamphurupuru vikaŵanga vifupi.

²⁸Chigomezgu cha murunji chimaliya mu kukondwa, kweni cho wagomezga wamphurupuru chimaliya pa waka.

²⁹Ambuya ndi linga kwaku mweniyo nthowa yake njakunyoroka, kweni ndi phasulu ku wakuchita uheni.

³⁰Murunji kuti wakanderezgekangapo cha, kweni wamphurupuru kuti wakajanga mu charu cha.

³¹Mlomo wa murunji, utuzga zeru, kweni lilime lakulandizga likadumulikanga.

³²Milomo yamu runji yiziŵa chenicho nchamarondeka, kweni mlomo wa wamphurupuru uziŵa chenicho nchakulandizga.