Read gitonga Nthanthi 14 Bible Online

Nthanthi 14 - gitonga bible

Nthanthi 14

¹Zeru yizenga nyumba yake, kweni kupusa ndi manja ghake kutiyipasuliya pasi.

²Mweniyo watenda mu kunyoroka watopa Ambuya, kweni mweniyo ngwakupatuka mu nthowa zake watiŵayeya.

³Kurongoro kwa wakupusa ndindodo yapa msana pake, kweni milomo ya ŵazeru yikaghasunganga.

⁴Kweniko kulivi ng'ombe kulivi mbuto; kweni kurgha kwa kuzara kutuza ndi nthazi ya ng'ombe.

⁵Kaboni mukongolekwa kuti wanama cha, kweni kaboni mutesi wapingiya maboza kubwalo.

⁶Wakunyoza wapenja kwa waka zeru, kweni chinjeru nchiyuyu ku munthu wakuwamo.

⁷Mu kureke kuŵapo kwawakupusa, pakuti penipa kuti mukumanapo ndimazu gha chinjeru cha.

⁸Zeru ya munthu wakutakataka nkhuteska nthowa yake, kweni kupusa kwa ŵakupusa kupusika.

⁹Chiuta wayeya wamphulupulu, kweni wakunyoroka walonde mwaŵi wake,

¹⁰Mtima uziŵa kuŵaŵa kwa weneko, ndipo palivi mlendo wasangana nawo likondwa lake.

¹¹Nyumba ya wamphulupulu yikabwangandulikanga, kweni hema la wakunyoroka likanozganga.

¹²Yilipo nthowa yeniyo yiwoneka uli njamampha ku munthu, kweni umali wake ndi nthowa yaku nyifwa.

¹³Chingana ngwakuseka mtima ngwa chitima, ndipo umari walikondwa nchisungu.

¹⁴Munthu wakulandizga wakazazikanga ndi chipasi cha nthowa zake, ndipo munthu wamampha ndi chipazi cha nchitu zake.

¹⁵Nchunkhu munthu wavwana ndi vyose, kweni wajiteska walereska kweniko watiya.

¹⁶Munthu wazeru wacheŵa ndipo watuwako ku uheni, kweni wakupusa wataya kujikanizga, ndi watuŵa mukata kuphwere.

¹⁷Munthu wakukara ruŵi wachita kwakupusa, kweni munthu wa maghanughanu wazika.

¹⁸Nchunkhu munthu wapenja kupusa, kweni wakuteska wavwalikika ndi chinjeru.

¹⁹Uheni ulamba pasi paurongo pa umampha, wamphulupulu pa malikomo gha murunji.

²⁰Wakusauka watinkhika chingana nkhu muzengezgani wake, kweni wa chuma wendi mabwezi ghanandi.

²¹Mweniyo wayuyuwa muzengezgani wake ngwa mphulupulu, kweni walikondwa ndi mweniyo wachita wezi ku wakusauka.

²²Asi ŵalakwa wo ŵapangizga uheni? Weniwo ŵapangizga umampha ŵakumana ndi kuyithereska ndi kugomekezgeka.

²³Mu kutakataka kose mwechanduwu, kweni kurongoro ŵaka kupaska ŵaka kukhumbira.

²⁴Chisoti cha ŵazeru ndi zeru yawo, kweni kupusa nkhuvwala kwa ŵakupusa.

²⁵Kaboni muneneska wataska maumoyo, kweni mweniyo wabwetuwa mautesi ngwakukombo.

²⁶Mu kopa Ambuya munthu wendigomezgu la nthazi, ndipo ŵana ŵake ŵakaŵanga ndi pakubisama.

²⁷Kopa Ambuya nchisima cha umoyo, alinga kuti munthu wapambane ndi viŵana vya nyifwa.

²⁸Mu unandi ŵanthu mwe unkhankhuwa karonga, kweni kwambura ŵanthu mwana wa karonga wanangika.

²⁹Mweniyo wareka kukala ruŵi wendikuwamo kukuru, kweni mweniyo ngwakukala ruŵiruŵi wakuzga kupusa.

³⁰Muwongo wakuzika upaska umoyo ku nyama, kweni ukari uvundiska viwanga.

³¹Mweniyo wasauska munthu wakusauka watuka Mulengi wake, kweni mweniyo ngwawezi ku wakusauka watimutumbika.

³²Wamphulupulu wathereskeka ndikuchita kwake kwa uheni, kweni marunji wasaniya chakubisamamo chifukwa cha ukongorekwa wake.

³³Zeru yija mu muwongo wa munthu wa wakuwamo, kweni kuti yiziŵika cha mu mtima wa wakupusa.

³⁴Urunji ukuzga khamu la ŵanthu, kweni uheni nchilengesku kuŵanthu ŵe wose.

³⁵Mteŵeti yo wachita kwa zeru wendi mwaŵi wa karonga, kweni ukari wake utuwa paku yo watakataka kwakulengeska.