Read gitonga Nthanthi 16 Bible Online

Nthanthi 16 - gitonga bible

Nthanthi 16

¹Vyakulongoso vya muwongu vya munthu, kweni kwamuka kwa lilime kutuwa ku Ambuya.

²Nthowa zose za munthu zakutowa mu maso gha mweneko; kweni Ambuya wapima mzimu.

³Pereka nchitu yako ku Ambuya, ndipo vyakulongoso vyako vikachitikanga.

⁴Ambuya ŵakuchita vinthu vyose ndikafukwa kake, chingana ngwa mphulupulu chifukwa cha zuŵa la suzgu.

⁵We yose mweniyo ngwakujikuzgangwa ukazuzi ku Ambuya; ziŵiska kuti warekenge kulangika cha.

⁶Pakujithereska ndi kugomekezgeka mphulupulu yilipika, ndi so ndi kopa Ambuya munthu wareka uheni.

⁷Asani nthowa za munthu zikondwereska Ambuya, iwo ŵachitiska ŵakupindikana ŵake nawo kuŵa nayo ndi chimangu.

⁸Nkhwamamphako kamanavi pamoza ndi urunji kwakuruska kuronde vyuma vinandi pamoza ndi kupusika.

⁹Muwongo wa munthu urongoso nthowa yake, kweni Ambuya arongozga muchapu wake.

¹⁰Kudumuwa makani kwakufiskika kwe pa milomo ya karonga, mlomo wake kuti ulakwa cha mu cheruzgu.

¹¹Mweso wambura kupusika ndi masikelo vya Ambuya; mauzitu ghose ghamu thumba ndi nchitu yawo.

¹²Mbukazuzi ku ŵakaronga kuchita uheni, pakuti chitengo chikhozgeka ndi urunji.

¹³Milomo yirunji ndi likondwa lakaronga, ndipo watanja mweniyo wakamba chenicho nchamampha.

¹⁴Ukari wakaronga ndi thenga la nyifwa ndipo munthu wazeru waupozgenge.

¹⁵Mu ukweru wachisku cha karonga mwe umoyo, ndipo mwaŵi wake we uli ndi mitambo yo tituza ndi vuwa yakudanga.

¹⁶Kusaniya zeru nkhwamampha kwakuruska golide kusaniya kuwamo nkhwamampha kwakuruska siliva.

¹⁷Nthowa yikuru ya ŵakurunji kayinganamukiya kunyake kutuwako ku uheni; mweniyo wavikiriya nthowa yake wasunga umoyo wake.

¹⁸Kujikuzga kudanjiya paurongo papharghaniku, ndi mtima wakujikuzga paurongo pa kuwa.

¹⁹Nkhwamamphaku kuŵa ndi mzimu wakujiyuyuwa pamoza ndi ŵasauchi, kwakuruska kugaŵana vyachiskoŵa ndi wakukondwa.

²⁰Mweniyo waphwere mazu wakasakatanga ndipo wakukondwa, ndi mweniyo wagomekezga mu Ambuya.

²¹Wa zeru mu mtima wadanika munthu wakusanda, ndipo kurongoro kwakukondweska kukuzga kuchichizga.

²²Zeru nchisima cha umoyo kwaku mweniyo we nayo, kweni kupusa ndi likhwechu la ŵakupusa.

²³Muwongo wa wazeru uchita kurongoro kwake kuŵa cheruzgu, ndipo kusazgiyako kuchichizga ku milomo yake.

²⁴Mazu ghakukondwereska ghachita uli nchisa cha njuchi, kunowa ku mzimu ndi umoyo wamampha ku liŵavu.

²⁵Yilipo nthowa yeniyo yiwoneka uli njamampha ku munthu, kweni umari wake ndi nthowa yaku nyifwa.

²⁶Nja ya wanchitu yitumutataliya, mlomo wake utumchichizga.

²⁷Munthu wa uliuli wafinga uheni, ndipo kurongoro kwake kwe uli ndi moto wakocha.

²⁸Munthu wakupuruska watandaniska ndeu, ndipo wakutokotezga wapatuwa mabwezi ghakuziŵirizgana nagho.

²⁹Munthu wa ndeu wapusika mzengezgani wake, ndipo watimurongozga mu nthowa yeniyo kuti njamampha cha.

³⁰Mweniyo wakupiya maso ghake warongoso vinthu vyakupuruska, mweniyo wasunama milomo yake wachitiska uheni.

³¹Mutu wa nyivu nchisoti chaunkhankhu; chandukiya mu umoyo wa urunji.

³²Mweniyo ngwakuura kukwiya ruŵi ngwamamphaku ku wanthazi, ndipo mweniyo wateruzga mzimu wake waruska mweniyo wakwamphuwa msumba.

³³Mphenduzga yichitika pa chigha, kweni cheruzgu chose chituwa ku Ambuya.