Read gitonga Nthanthi 19 Bible Online

Nthanthi 19 - gitonga bible

Nthanthi 19

¹Wamamphaku ndi munthu mukavu mweniyo watenda mu ukongorekwa, kwakuruska munthu mweniyo ngwakurandizga mu kurongoro ndipo ngwakupusa.

²Kuti kuyamu cha kuti munthu wajenge wambura chinjeru, ndipo mweniyo wachita fulumila ndi marundi ghake wataya nthowa yake.

³Penipo ubeleŵeza wa munthu utole nthowa yake ku phasulu, mtima wake ukalipiya Ambuya.

⁴Uromba utuza ndi mabwezi ghafya ghanandi, kweni munthu mukavughatu muthaŵa mabwezi ghake.

⁵Kaboni mutesi kuti walekenge kulangika cha, ndipo mweniyo wakamba mautesi kuti wathaŵenge cha.

⁶Ŵanandi ŵapenja mwaŵi wamunthu wakupaska kwawezi, ndipo we yose ndibwezi la munthu mweniyo wapaska vyaulera.

⁷Ŵana ŵanyake wose ŵa mukavu ŵatimutinkha; katazi mabwezi ghake ndigho gharuska kumunthaŵa, wati ŵandondoloska ndi mazu kweni kuti watuŵa nagho cha.

⁸Mweniyo wasaniya zeru watijanja; mweniyo wasunga kuwamo wakasakatanga.

⁹Kaboni mutesi kuti warekenge kulangika cha, ndipo mweniyo wakamba mautesi wakafwanga.

¹⁰Kuti kutumwenere cha wakupusa kuja mu vyakunozga, mphanyiku kamanavi kuti muŵanda wausi ŵana ŵakaronga.

¹¹Ghanaghanu lamampha likanizga munthu kukara ruŵi, ndipo mbunkhankhu wake, kugowoke kunanga.

¹²Ukari wa karonga we uli nkhukoroma kwakamanakamana kwa nkharamu, kweni lisungu lake le uli ndi dungwi pa uteka.

¹³Mwana mubereŵeza ndi phasulu ku wiske, ndipo munthukazi wapa mlomo nkhunthona kwakukiyakiya kwa vuwa.

¹⁴Nyumba ndi uromba nchihara chakutuwa kwa uskeu, kweni muwoli mukongorekwa waturiya ku Ambuya.

¹⁵Ukata utaya mutulo tuzitu, ndipo munthu mulesi wakakomwanga ndi nja.

¹⁶Mweniyo wasunga dangu wasunga umoyo wake, mweniyo wayeya mazu wakafwanga.

¹⁷Mweniyo ngwa chifundu ku mukavu wakongoleska Ambuya, ndipo akamulipanga pa nchitu yake.

¹⁸Langanga mwana wako penipo lichalipo gomezgu; reka kuŵika mtima wako pa kwanangika kwake.

¹⁹Munthu wakukalipa ukongwa wakalipanga thumba; pakuti asani mutimuleka, mukawerezganga kuchichita.

²⁰Tegherezga cho atukupanga ndi ronde sambizgu, alinga kuti usaniye zeru za mukucha.

²¹Maghanoghano nganandi mu muwongo wa munthu, kweni nchenicho chakukhumba Ambuya cho chikachitikanga.

²²Cho chikhumbikwa mu munthu nkhujithereska, ndipo munthu musauchi ngwamamphaku waruska mutesi.

²³Kopa Ambuya kurongozge ku umoyo, ndipo mweniyo we nako waja ndi kukhorwa, kuti urwani ukamuziyanga cha.

²⁴Mukata wabizga janja lake mu mbali ndipo kuti wakaliwezgiyanga ku mlomo nako cha.

²⁵Puma wakunyoza, ndipo wauliuli wasambirenge kujitintha; chenya munthu wakuwamo, ndipo wakanduwanga chinjeru.

²⁶Mweniyo wachitiya nkhaza wiske ndi wadikiska nyina, ndi mwana mweniyo walengeska ndipo watole kuchenya.

²⁷Reka, wa mwana wangu, kuvwa kusambizga kweniko kutukupatuwako ku mazu gha zeru.

²⁸Kaboni wambura kwene wanyoza cheruzgu chirunji, ndipo mlomo wa wamphulupulu uparuwa kwananga.

²⁹Kususkika kulindizga wakunyoza, ndi kukhwechuwa nkhwa ku musana kwa ŵabereŵeza.