Read gitonga Nthanthi 2 Bible Online

Nthanthi 2 - gitonga bible

Nthanthi 2

¹Wa mwana wangu, asani urondiyenge mazu ghangu ndi kusunga ukongwa marangu ghangu,

²kujariya gutu lako kuvwiska zeru ndi kuŵika mtima wako ku vinjeru;

³inya, asani uliliyenge chinjeru ndipo usoskenge mazu ghako kuti uŵe ndi zeru;

⁴asani uzipenjenge nge ndi siliva ndikuzipenja uli upenja mbiku yakubisika;

⁵po ndipo ukaziŵanga kopa Ambuya ndi ukasaniyanga zeru yaku Chiuta.

⁶Pakuti Ambuya apaska zeru; ku mlomo wawo kutuwa zeru ndi kuwamo;

⁷aŵikiya mbiku ya chinjeru chakufikapo ŵakunyoroka; iwo ndi nguru kwaku ŵeniwo ŵatenda mu urunji;

⁸ŵakuvikiriya nthowa za cheruzgu ndi kusungirizga nthowa ya ŵatuŵa ŵawo.

⁹Po ndipo mukawangamo urunji ndi cheruzgu chirunji ndi kunyoroka, kwa nthowa yose yamampha;

¹⁰pakuti zeru yikazanga mu mtima wako, ndipo chinjeru chikaŵanga chakukondweska ku mzimu wako;

¹¹kughanaghana kurunji kukakuphwerenga; kuwamo kukakurongozganga,

¹²kukutaska ku nthowa ya uheni, ku ŵanthu ŵakukamba kwakulandizga,

¹³ŵeniwo ŵajowo nthowa za kunyoroka kwachenda mu nthowa za mdima,

¹⁴ŵeniwo ŵakondwere mu kuchita uheni ndi kusekere mu kulandizga kwa uheni;

¹⁵ŵanthu ŵeniwo nthowa zawo zakunyongoloka, ndipo mbakupatika mu nthowa zawo.

¹⁶Ukataskikanga ku munthukazi muyaghayagha ku mchenjezi ndi mazu ghake ghakoloŵa,

¹⁷mweniyo wareka bwezi la usungwana wake ndipo waluwa phanganu laku Chiuta wake;

¹⁸pakuti nyumba yake yisere pasi ku nyifwa, ndi nthowa zake ku miduzi;

¹⁹palivi yumoza wakuya kwaku iyo mweniyo waweko chingana nkhuti wasaniya so nthowa za umoyo.

²⁰Viyo iwe ukayendanga mu nthowa ya ŵanthu ŵamampha ndi kujaliliya mu ŵagurwi ŵa ŵarunji.

²¹Pakuti ŵakunyoroka ŵakajanga mu charu, ndipo ŵanthu ŵakujisunga umampha ŵakajaliriyanga mwaku cho;

²²kweni ŵaheni ŵakadumulikangako ku charu cho, ndipo ŵakunyenga ŵakazuwikangamo.