Read gitonga Nthanthi 22 Bible Online

Nthanthi 22 - gitonga bible

Nthanthi 22

¹Zina lamampha lisankhike kwakuruska mausambasi ghakuru, ndipo mwaŵi ngwamamphaku kwakuruska siliva ndi golide.

²Musambasi ndi mukavu ŵakumana pamoza; Ambuya ndiwo Mlengi waku iwo wose.

³Munthu wakuphwere wawona urwani ndipo wabisama; kweni munthu wauliuli wakiyakiya, ndipo wakomwiyapo.

⁴Mphoto ya kujiyuyuwa ndi kopa Ambuya mbusambasi ndi ulemu ndi umoyo.

⁵Minga ndi viŵana vyemu nthowa yaŵakupuruska; mweniyo watijiphwere wakajanga kutali nawo.

⁶Sambizga mwana mu nthowa yeniyo watenere kwendamo, ndipo pa waŵa mura kuti wapatukengemo cha mwaku yo.

⁷Musambasi wateruzga wakusauka, ndipo wakukongola ndi muŵandawa wakumukongoleska.

⁸Mweniyo wapanda cheruzgu chizira-urunji wakavunanga soka likuru ndipo ndodo ya ukari wake yikatondekanga.

⁹Mweniyo wendi jiso la lisungu wakatumbikikanga, pakuti wasangana kurgha kwake ndi ŵakusauka.

¹⁰Dikiska wakunyoza, ndipo ndeu yikatuwangapo, ndipo kuhohotana ndi kutukana vikamalanga.

¹¹Mweniyo watanja utozi wa mtima, ndi mweniyo kurongoro nkhwawezi, ndi wakaŵanga ndi karonga uli ndi bwezi lake.

¹²Maso gha Ambuya, ghalereska pa chinjeru, kweni ndi mweniyo wasuska mazu gha wambura chivwanu.

¹³Mukata watiti, “Kwe nkharamu kubwalo! Ndikabayikanga mu mseu!”

¹⁴Mlomo wa munthukazi wa masumasu ndi zenji litali; mweniyo Ambuya wamukalariya wawenge mwaku lo.

¹⁵Ubereŵeza ukumangika mu mtima wa mwana, kweni ndodo yakuchenjezga yitindidikiskiya kutali ndi iyo.

¹⁶Mweniyo wasauska mukavu pakukhumba kwandaniska uromba wake, pamwenga wapaska ku musambasi wakakhumbilanga pavuli.

¹⁷Tegherezga guto lako, ndi uvwe mazu gha ŵazeru, ndipo ŵika muwongo wako ku chinjeru changu;

¹⁸pakuti chikakukondweskanga asani ukavisunganga mukati mwako, asani vyose vyakurongosoleka pa milomo yako.

¹⁹Alinga kuti chigomezgu chako chiŵe mu Ambuya ndakuziŵiska vyo iwe msana wale, inya kwaku iwe.

²⁰Kumbi ndilivi kukulembe vyakukambika machumi ghatatu vya kuchenjezga ndi chinjeru,

²¹kukurongo chenicho nchakurunjika ndi chauneneska, alinga kuti upereke kwamuka kwa kuneneska kwaku ŵeniwo ŵangukutuma?

²²Ungamubiyanga mukavu pakuti ndi mukavu, pamwenga kung'anya wakuyuzgika pa likomo;

²³pakuti Ambuya akaŵakambiyanga murandu wawo ndi kupoka umoyo waku ŵeniwo ŵapoka umoyo wawo.

²⁴Reka kuchita ubwezi ndi munthu mweniyo ngwa chikalalizga chingana nkhurongozga ndi munthu wa ukari,

²⁵vinu ungasambira nthowa zake, ndi ungawira mu chiŵana.

²⁶Ungaŵanga yumoza wa ŵakuŵeniwo ŵapereka ndindila, ŵeniwo ŵatuŵa ŵakaboni ŵa ngongole.

²⁷Asani ulivi kanthu keniko ungalipa, chifukwa nchine nanga chita chakocho ulapo chatoleka?

²⁸Munganderezganga cha mphaka yacharu ya kale yeniyo auskemwe ŵangujintha.

²⁹Mutumuwona munthu wakuziŵiskamu nchitu yake? Iyo wakamanga paurongo pa ŵakaronga, kuti wakamanga paurongo pa ŵanthu ŵauliuli cha.