Read gitonga Nthanthi 23 Bible Online

Nthanthi 23 - gitonga bible

Nthanthi 23

¹Penipo uja pasi kurgha pamoza ndi wakuwusa, lereska ukongwa vyenivyo vye paurongo pako,

²ndipo ŵika chimangu ku chigolomelo chako asani we munthu nkharghi.

³Ungakhumbilanga vyakunona vyake, pakuti nkhurgha kwakunyenga.

⁴Reka kutakatakiya uromba, uŵe wazeru kureka.

⁵Maso ghako ghachilereska paku cho, mbwenu charuta, pakuti ruŵiruŵi chitijitole mapapa, kuphululuka uli ndi nombo kulata kuchanya.

⁶Reka kurgha kurgha kwa munthu mukavu, ungakhumbilanga vya kunona vyake cha;

⁷pakuti we uli ndi mweniyo waŵerenge mukati. Iyo watiti kwako, “Rghanga ndi kumwa”; kweni mutima wake kuti we pamoza nawe cha.

⁸Ukaukuwanga matozi ghenigho wargha, ndi kusakaza mazu ghako ghakukondweska.

⁹Reka kukambiya mu makutu ghamubereŵeza, pakuti iyo wakanyozanga zeru ya mazu ghako.

¹⁰Unganderezganga cha mphaka yacharu ya kale pamwenga kusere mu minda ya ŵambura auskeu;

¹¹pakuti mpozomoske wawo ngwanthazi; waŵakambiyenge mlando wawo, wa Apaku iwe.

¹²Wika muwongo wako pa chisambizgu, ndi gutu lako ku mazu gha chinjeru.

¹³Ungalekanga cha kulanga mwana, asani utumupuma ndi ndodo kuti wakafwanga cha.

¹⁴Asani utumupuma ndi ndodo ukataskanga umoyo wake ku muunda.

¹⁵Wa mwana wangu, asani mtima wako ngwa zeru, mtima wangu nawo ukakondwanga.

¹⁶Mzimu wangu ukasekerenga penipo milomo yako yikamba cho nchakurunjika.

¹⁷Mtima wako ungachitiyanga sanje ŵaheni cha, kweni lutiliyanga mu kopa Ambuya zuŵa lose.

¹⁸Kwakuneneska kwe umukucha, ndipo gomezgu lako kuti likadumulikangako cha.

¹⁹Ayivwa, wa mwana wangu, ndipo uŵe wa zeru, ndipo longozge muwongo wako mu nthowa yo.

²⁰Ungayanga mukati mu ŵakwanjiska vinyo cha pamwenga mukati mu nkharghi za nyama;

²¹pakuti ŵakulowe ndi nkharghi ŵakasaukanga, ndipo ulesi ukamuvwalikanga malizwazwa munthu.

²²Tegherezga ku usu mweniyo wangukupapa, ndipo reka kunyoza nyoko penipo wakota.

²³Gula uneneska, ndipo ungauguliskanga cha; gula zeru, kusambizga ndi kuwamo.

²⁴Wiske wa murumji wakasekerenga ukongwa; mweniyo wabala mwana wa zeru, wakakondwerenga mwaku iyo.

²⁵Chita kuti wakondwe usu ndi nyoko, yo munthukazi wangukupapa wakondwere.

²⁶Wa mwana wangu, undipaske mtima wako, ndipo ughachite maso ghako ghateske nthowa zangu.

²⁷Pakuti mureŵe ndi zenji litali, ndipo munthukazi chisembwere, nchisima chifinyi.

²⁸Wabisama ndi kukhazga uli ngwakupoka ndipo watandaniska ŵambura chivwanu mukati mu ŵanthurumi.

²⁹Njani wendi kwenjerwa? Njani wendi chitima? Njani wendi ndeu? Njani wendi kudandaula? Njani wendi mabala ghambura kafukwa? Njani yo wendi kuchesama maso?

³⁰Ndiŵeniwo ŵasimpha nyengo yitalipa vinyo, ŵeniwo ŵatendayenda kwachesa vinyo wakusazga.

³¹Reka kulereska pa vinyo penipo ngwakuchesama, penipo waŵira mu chandi ndipo wabwanthukiya pasi limanalimana.

³²Pa umari waruma uli ndi njoka, ndipo wanjikituwa uli ndi chipi.

³³Maso ghako ghakawonanga vinthu vyachilendo ndipo muwongo wako ukabwetuwanga vinthu vyakunyongoloska.

³⁴Ukaŵanga uli ndiyo wagona pasi munyanja mukati, uli ndiyo wagona pachanya pa mulongoti wa boti.

³⁵“Wangundipuma,” ndimu ukakambiyanga, “Kweni kuti ndingupwetekeka cha; ŵangundipuma, kweni kuti ndinguwapo cha. Kumbi ndiyukenge zuŵanji? Ndikapenjanga kumwa kunyake.”