Read gitonga Nthanthi 24 Bible Online

Nthanthi 24 - gitonga bible

Nthanthi 24

¹Ungaŵachitiyanga sanje cha ŵanthu ŵaheni, chingana nkhunweka kuŵa nawo pamoza;

²pakuti miwongo yawo yipanga ukari ndipo milomo yirongoro za urwani.

³Nyumba yizengeka ndi zeru, ndipo ndi kuwamo yisungika;

⁴ndi chinjeru vipinda vizazika ndi uromba wose wakuzirwa ndiwakukondweska.

⁵Munthu wa zeru ngwakulimba kwakuruska munthu wanthazi, ndipo munthu wa chinjeru waruska mweniyo wendi nthazi,

⁶pakuti ndi urongozgi wa zeru ungaziŵa kupota nkhondo yako, ndipo mu unandi wa ŵakupangizga mwe upundi.

⁷Zeru yitumuŵiya yizitu mubereŵeza; mu likomo kuti wajura mlomo wake cha.

⁸Yo waghanaghana kuchita chiheni, wakadanikanga muyuska-urwani.

⁹Kupangika kubereŵeza ndi mphulupulu ndipo wakunyoza mbukazuzi ku ŵanthu.

¹⁰Asani ulakatuka mu zuŵa lasuzgu nthazi yako njimana.

¹¹Pozomoska ŵeniwo ŵatoleke ku nyifwa; siya ku vuli ŵeniwo ŵaguŵa wachiya kukubayika.

¹²Asani utiti, “Ehe tengavi kuchiziŵa ichi,” kumbi mweniyo wapima mtima, kuti watichiziŵa cha chenichi? Kumbi mweniyo wasunga mzimu wako kuti watichiziŵa cha chenichi, ndipo kumbi iyo kuti wakalipilanga munthu kwakuyana ndi nchitu yake cha?

¹³Wa mwana wangu, urghenge uchipa kuti ngwamampha, ndipo vyakunthona vya chisa cha njuchi vya kusamuka mu mlomo wako.

¹⁴Uziŵe kuti ndimu yilili zeru kumzimu wako; asani wayibowozga, kukaŵanga umukucha weneko, ndipo gomezgu lako kuti likadumulikangako cha.

¹⁵Ungabisamanga kuŵeramiya cha uli ndi munthu wamphulupulu yo waŵeramiya wakurunjika; ungachitanga nkhaza ku nyumba yake cha,

¹⁶pakuti munthu murunji watuwankhonde ndi kaŵi ndipo wayuka so; kweni ŵamphulupulu ŵathereskeka ndi suzgu.

¹⁷Ungakondwerenga asani wakupindikana wako watuwa, ndipo mtima wako ungasekeriyanga wachiguŵa;

¹⁸Vinu Ambuya angawonako ndiangakalipa, ndi kutuzgako kwaku iyo ukari wawo.

¹⁹Ungatenthemanga cha chifukwa chaŵakuchita uheni, ndipo ungachitiyanga sanje wamphulupulu;

²⁰pakuti munthu muheni walivi umukucha; nyali pa wamphulupulu yikazimwikanga.

²¹Wa mwana wangu, opanga Ambuya ndi karonga, ndipo ungarekanga kuvwiya wose ŵaŵi;

²²pakuti suzgu yakutuwa kwaku wo yikazanga kwa mabuchibuchi, ndipo njani watiliziŵa phasulu lenilo likatuwanga kwaku wo ŵaŵi viyo?

²³Yagha nagho ndi mazu ghakukamba ŵazeru. Kweruzga kwambura kufikapo kuti nkhwamampha cha.

²⁴Mweniyo watiti ku wamphulupulu, “Ulivi mlando,” wakatembekanga ndi ŵanthu, kutinkhika ndi mitundu;

²⁵kweni ŵeniwo ŵachenya ŵamphulupulu ŵakaŵanga ndi kukondwa, ndipo thumbiku la mampha likaŵanga paku wo.

²⁶Mweniyo watamuka kwakurunjika wafyofyontha milomo.

²⁷Rongosole kubwalo nchitu yako ujirongosole vyose vyaku muunda, ndipo pavuli pake uzenge nyumba yako.

²⁸Ungachitiyanga ukaboni wakususkamuzengezgani wako kwambura kafukwa, ndipo ungapusikanga cha ndi milomo yako.

²⁹Ungakambanga cha kuti, “Ndikamuchitiyanga uli ndimo iyo wachitiya kwaku ine; ndikamuwezgiyanga yo munthu paku cho wachita.”

³⁰Ndingudumuwa pa munda wa mukata, pa munda wa mphereska wa munthu wambura maghanoghanu;

³¹ndipo ehe, wose unguŵinda ndi minga; charu chinguŵinda ndi kabata, ndipo lisitu lake la mya lingubwangandukiya pasi.

³²Ndipo ndinguwona ndipo ndinguchighanaghana; ndingulereska ndinguronda sambiru.

³³“Tulo tumanavi, kusiwa kumanavi, kupeta manja kamanavi kupumuwa,”

³⁴ndipo ukavu ukazanga pako uli ngwakupoka, ndipo kusoŵa uli ndi munthu wakuŵa ndi vidya vyakurwiya.