Read gitonga Nthanthi 26 Bible Online

Nthanthi 26 - gitonga bible

Nthanthi 26

¹Ulindi matalala pa chipwepwe pamwenga vuwa pa chivuna viyo ulemu kuti utumuyana cha mubereŵeza.

²Uli ndi kaŵeruŵeru mu mwenera wake, uli ndi kaŵeruŵeru mukuphuluruka kwake, thembo lo ndambula kafukwa kuti likonda cha.

³Liswazu la kavalo, chakukoloŵeke mu mphunu cha mbunda, ndi ndodo ya pa msana wa ŵabereŵeza.

⁴Ungamwamukanga mubereŵeza kwakuyana ndi ubereŵeza wake cha, vinu ungaŵa uli ndiyo iwe wamweni.

⁵Wamuke mubereŵeza kwakuyana ndi ubereŵeza wake, vinu wangaŵa wa zeru mu maso gha mweneko.

⁶Mweniyo watuma uthenga mu janja la mubereŵeza watijidumuwa marundi gha mweneko, ndipo watumwa nkhaza.

⁷Uli ndi marundi gha wakapunduka, ghenigho ghaning'ina waka, ndimu yilili nthanthi mu mlomo wa ŵabereŵeza.

⁸Uli ndi mweniyo wamangiriya mwa mu luzi lakupong'e ndimu walili mweniyo wapaska ulemu kumubereŵeza.

⁹Uli ndi munga weniwo usere mu janja la wakuloŵe, ndimu yilili nthanthi mu mlomo wa bereŵeza.

¹⁰Uli ngwakupong'a uta yo walasa we yose, ndimu walili yo wakumba mubereŵeza mwenda nthowa pamwenga wakuloŵe.

¹¹Uli ndi garu yo wawere pa maukuzi ghake ndimu walili mubereŵeza mweniyo wawerezgapo ubereŵeza wake.

¹²Kumbi utimuwona munthu yo ngwa zeru mu maso gha mweneko? Gomezgu lilipo likuruku kumubereŵeza kwakuruska kwaku iyo.

¹³Mukata watiti, “Mwe nkharamu mu museu! Mwe nkharamu mu miseu!”

¹⁴Mwenimo chisasa chinderere pavisulo vyakumangiya vyake, mukata nayo so pa chita chake.

¹⁵Mukata wabizga janja lake mumbale, litumutonda kuliwezge ku mlomo.

¹⁶Mukata ngwazeru ku mu maso gha mweneko kwakuruska so ndi ŵanthu nkhonde ndi ŵaŵi, wo ŵangamuka kwakuyamo.

¹⁷Mweniyo waseremu mu ndeu yeniyo kuti njake cha we uli ndiyo wako makutu gha garu wakudumuwapo waka.

¹⁸Uli ndi munthu wakufuntha mweniyo wapong'a visulo vya moto, mivwi, ndi nyifwa,

¹⁹ndi munthu mweniyo wapusika muzengezgani wake ndi watiti, “Ndipekura waka!”

²⁰Chifukwa cha kusoŵa nkhuni moto uzimwa; ndipo penipo palivi wakusuza chiwawa chimara.

²¹Mo ghaliri maka ku fukunyira lamoto ndi nkhuni ku moto viyo ndimu walili munthu wa chiwawa pakuyuska ndeu.

²²Mazu gha wakusuza ghe uli nkhurgha kwakusamuka; ghasere mu viŵalu vya mukati limu vya liŵavu.

²³Uli nkhung'anima kwa kubwalo kwachiyaŵi cha dongo ndimu yilili milomo yakungozga yo yendi mtima uheni.

²⁴Mweniyo watinkha wabisa ndi milomo yake ndipo wabisirizga kupusika mu mtima wake;

²⁵Wachikamba kwa wezi, ungavwananga nayo cha, pakuti mwe vyaukazuzi nkhonde ndi viŵi mu mtima wake;

²⁶chingana kutinkha kwake kwabisika ndi uchenjezi, mphulupulu yake yikavumbulikanga pa unganu.

²⁷Mweniyo wakumba zenje wakawangamo, ndipo mwa ukamuweriyanga mweniyo wayamba kuwukunkhuzga.

²⁸Lilime litesi litinkha ŵakulimbana nalo, ndipo mlomo wakunyengere uchita phasulu.