Read gitonga Nthanthi 27 Bible Online

Nthanthi 27 - gitonga bible

Nthanthi 27

¹Reka kujikuzgiya la mawa, pakuti uziŵa cha mwenimo likaŵiyanga.

²Munthu munyake ndiyo wakulumbe kweni mlomo waku wamweni cha; mlendo, kweni milomo yaku wamweni cha.

³Mwa nguzitu, ndipo muchenga uzita, kweni kukala kwa mubereŵeza kuzita kwakuruska vyose viŵi.

⁴Chikwiya mbukari, ukari uphwanya, kweni njani wangamiya sanje?

⁵Kuchenya kwa pakweru kuruska chanju chakubisirizga.

⁶Mabamba gha bwezi ngakongolekwa, wakupindikana wafyofyontha kaŵikaŵi.

⁷Yo ngwakuguta watinkha uchi, kweni yo ngwa nja che chose cho nchakuŵaŵa chisamuka.

⁸Mwenimo kalandiya kayuni kutuwa ku chizimbu chake ndimu wachitiya munthu mweniyo walanda ku nyumba yake.

⁹Mafuta ndi vyachema vikondwereska mtima, kweni mzimu uparuka ndi suzgu.

¹⁰Bwezi laku ndi bwezi la ausu ungaŵarekanga; ndipo ungayanga ku nyumba ya mwana munyake mu zuŵa la suzgu. Wamamphaku ndi mzengezgani mweniyo we'pafupi kuruska mwana munyako mweniyo we patali.

¹¹Uŵe wa zeru, wamwana wangu, ndipo ukondwereske mtima wangu, alinga ndamuke mweniyo watindichenya.

¹²Munthu wakuteska wawona urwani ndipo wabisama, kweni wauliuli wakiyakiya ndi wakomwiyapo.

¹³Ronda chivwalu cha munthu asani wapereke chikoli mlendo, ndipo umuchite kuŵa ndindira asani wapereke chikoli ŵalendo.

¹⁴Mweniyo watumbika mu zengezgani wake ndi mazu gha kudanirizga, pakuyuka ndi mlenjilenji, wakanenekanga kuti nkhutemba.

¹⁵Kuyoyoka kwakukiyakiya mu zuŵa la vuwa, ndi munthukazi wakuŵereŵeta viyanana;

¹⁶kumukanizga wa viyo nkhukanizga mphepo pamwenga kubwaka mafuta mu janja lako lakurghiya.

¹⁷Chisulo chinora chisulo, ndi munthu yumoza wanora munyake.

¹⁸Mweniyo waphwere chimuti cha mukuyu wakarghanga chipasi chake, ndipo mweniyo wavikiriya mbuyake wakatumbikikanga.

¹⁹Mwenimo chisku chitamukiya chisku mu maji viyo so muwongo wa munthu ulongo mo walili munthu.

²⁰Muunda ndi pharghaniku kuti viguta cha, ndipo cho chireka kuguta ndi maso gha munthu.

²¹Mumphika wakusongonoka ngwa siliva ndipo ng'anjo nja golide, ndipo munthu waziŵika ndi kurumba kwake.

²²Umudini mubereŵeza mu dule ndi musu pamoza ndi kurgha kwakupulika, ubereŵeza wake kuti ukamutayanga cha.

²³Uziŵe umampha kajalidu ka viŵetu vyako, ndipo uphwere miskambo yako;

²⁴pakuti uromba kuti ujaliliya muyaya cha; ndipo kumbi chilemba cha ufumu chilutikiya ku migonezi yose?

²⁵Asani uteka wamara, ndipo chipozwa chifya chime, ndipo vyakume vya pa mapiri viunjikika,

²⁶mberere zikamupaskaninga vyakuvwala vinu, mbuzi mutengo wa munda;

²⁷pakaŵanga mukaka wa mbuzi wakukwana wakurgha kwinu, wa kurgha kwa ŵamunyumba yinu, ndi kurere ŵamwali ŵinu.