Read gitonga Nthanthi 29 Bible Online

Nthanthi 29 - gitonga bible

Nthanthi 29

¹Mweniyo wasuskika kaŵikaŵi kweni wangangamika mbwenu khosi lake wakaswekanga kwamabuchibuchi wambura machizgika.

²Penipo ŵarunji ŵemu mtufu, ŵanthu ŵakondwere; kweni asani ŵamphulupulu ŵateruzga ŵanthu ŵatamantha.

³Mweniyo watanja zeru wakondwereska awiske, kweni mweniyo wakwatikana ndi ŵareŵi waparghang'a chuma chake.

⁴Ndi cheruzgu chirunji karonga wapereka ujazi wa chimangu ku charu, kweni mweniyo ngwalikwanu kwanu la vyaulera watichibwanganduwa.

⁵Munthu mweniyo wapusika muzengezgani wake wathyiya marundi ghake chilepa.

⁶Munthu wamphulupulu ngwakuthyika ndi utimbanizi wake, kweni munthu murunji watumba ndi wakondwa.

⁷Munthu murunji waziŵa vyakwenere vya mukavu; munthu wa mphulupulu kuti wawamo cha chinjeru cha viyo.

⁸Ŵakunyoza ŵatocha msumba, kweni ŵanthu ŵazeru ŵatuzgapo chikwiya.

⁹Asani munthu wazeru wapindana ndi mubereŵeza, mubereŵeza wakaripa ndi kuwoya, ndipo palivi kuchetama.

¹⁰Ŵanthu ŵakunweka ndopa ŵatinkha wambura kalema, ndipo wamphulupulu wapenja umoyo wake.

¹¹Mubereŵeza waŵikapo mtima wose pa ukari wake, kweni munthu wazeru mwachisisi wagowoka.

¹²Asani mweruzgi wategherezga ku utesi nduna zake zose zikaŵanga za mphulupulu.

¹³Munthu mukavu ndi wakuyuzga ŵakumana pamoza; Ambuya ŵapaska ukweru ku maso ghaku wo ŵaŵi.

¹⁴Asani karonga wateruzga mukavu ndi urunji, chitengo chake chikamanga muyaya.

¹⁵Ndodo ndi kuchenya vipaska zeru, kweni mwana wakumulekelezga watole soni anyina.

¹⁶Asani wamphulupulu ŵepa mtufu utimbanizi ukuwa, kweni ŵarunji ŵakalereskanga pa kuwa kwawo.

¹⁷Ulangengi mwana wako ndipo wakakupaskanga chipumulu; wakapaskanga kukondwa ku mtima wako.

¹⁸Kweniko kulivi kuchima, ŵanthu ŵataya kujitintha, kweni wakutumbikika ndi mweniyo wasunga dangu.

¹⁹Ndi mazu ghanandi mteŵeti kuti walangika cha, pakuti chingana wawamo kuti waphwerengeko cha.

²⁰Utumuwona munthu mweniyo ngwafulumila mu mazu ghake? Ungamugomezga mubereŵeza kwakuruska iyo.

²¹Mweniyo wahiŵa mteŵeti wake kwamba ku wana, paumali wawonenge kuti ndiyo muhari.

²²Munthu wachikwiya wayuska ndeu, ndipo munthu wa chikalalizga wachitiska utimbanizi unandi.

²³Kujikuzga kwa munthu kukamusiskiyanga pasi, kweni mweniyo ngwakujiyuyuwa mumzimu wakarondanga thumbiku.

²⁴Yo wakwatikana ndi munkhungu watinkha umoyo wake; watuvwa kutemba kweni kuti wasumuwa kanthu cha.

²⁵Kopa munthu nkhuthya chiŵana, kweni mweniyo wagomekezga mu Ambuya we pakukho.

²⁶Ŵanandi ŵapenja kurumbika ndi mweruzgi, kweni ku Ambuya munthu waronde cheruzgu chirunji.

²⁷Munthu wambura kuchita urunji mbukazuzi ku murunji, kweni mweniyo nthowa yake njakunyoroka mbukazuzi ku wamphulupulu.