Read gitonga Nthanthi 4 Bible Online

Nthanthi 4 - gitonga bible

Nthanthi 4

¹Avwani, mwa ŵana, sambizgu la auskemwe, ndipo mutegherezge, alinga musakate zeru;

²pakuti nditukupaskani masambiru gha ujazi wamampha: mungatayanga sambizgu langu cha.

³Penipo ndenga mwana pamoza ndi ada, wakoloŵa, ndichiŵa ine pe ndija mu maso gha ama,

⁴ada ŵangundisambizga, ndipo ŵanguti kwaku ine, “Uchite kuti mtima wako ukoreske mazu ghangu; sunga marangu ghangu, ndi uje wamoyo;

⁵ungaluwanga, ndipo ungang'anamukangako ku mazu gha mlomo wangu. Uronde zeru, uronde kuwamo.

⁶Ungayirekanga cha, ndipo yikakusunganga; uyanjenge, ndipo yikakulongozganga.

⁷Kwamba kwazeru ndi uku: Ronda zeru, ndipo che chose cho ungaronde, ronde kuwamo.

⁸Uyizirwiske kuŵa pachanya, ndipo yikakukuzganga; yikakutumbikanga asani utiyivumbatiya.

⁹Yikavwalikanga pa mutu wako nkhata ya maluwa yakwenere; yikaŵikangapo pako mphumphu yamampha.”

¹⁰Yivwa, wa mwana wangu, ndipo ronde mazu ghangu alinga kuti virimika vya umoyo wako viŵenge vinandi.

¹¹Ndakurunguchizga nthowa ya zeru; ndakurongozga mu nthowa za kunyoroka.

¹²Uchenda, muchapu wako kuti ukalandanga cha; ndipo asani uchimbiya, kuti ukaguŵanga cha.

¹³Koreska chisambizgu, kutaya cha; uchivikiriye, pakuti ndicho umoyo wako.

¹⁴Ungaserenga mu nthowa ya ŵaheni cha, ndipo ungendanga mu nthowa ya ŵanthu ŵaheni cha.

¹⁵Uyithaŵe, kuya mwaku yo cha; tuwako kwaku yo dumuwanga lutanga.

¹⁶Pakuti ŵangagona cha kwambura kuti ŵachita chiheni; ŵapokeka tulo kwambura kuti ŵaguŵiska munthu.

¹⁷Pakuti ŵaturgha chiŵande cha uheni ndi ŵatuma vinyo wa ndeu.

¹⁸Kweni nthowa ya ŵarunji ye uli mbukweru wa matandakucha weniwo utuwiya-tuwiya mpaka kwachiya limu.

¹⁹Nthowa ya muheni ye uli ndi mdima wamunkhorwi; kuti ŵaziŵa cha chenicho ŵaguŵamo.

²⁰Wa mwana wangu, tegherezga ku mazu ghangu; ŵika gutu lako ku makambidu ghangu.

²¹Ungaghazomerezganga kuthaŵako ku maso ghako cha; ughasungengi mukati mu mtima wako.

²²Pakuti yigho mbumoyo kwaku mweniyo watighasaniya, ndipo nkhuchizga ku nyama yake yose.

²³Sunga mtima wako ndi kulereska kose, pakuti kwaku gho kupopoma tumisinje twa umoyo.

²⁴Tuzgako kwako mlomo wakubende, kakambidu kose kaheni kaŵi kutali kwaku iwe.

²⁵Maso ghako ghalereske kwakudunjika kunthazi, ndipo kuwona kwako kunyolokenge paurongo pako.

²⁶Uphwere nthowa ya marundi ghako, po ndipo nthowa zako zose zikaziŵikanga nadi.

²⁷Ungapatukiyanga ku marghe pamwenga ku maze; tuzgako rundi lako ku uheni.