Read gitonga Nthanthi 5 Bible Online

Nthanthi 5 - gitonga bible

Nthanthi 5

¹Wa mwana wangu, utengherezge ku zeru zangu, ŵika gutu lako ku kuwamo kwangu;

²alinga kuti usungenge maghanaghanu gha zeru, ndi milomo yako yivikiriyenge chinjeru.

³Pakuti milomo ya munthukazi muyaghayagha yinthona uchi, ndipo vyo wakamba iyo viteremusi kwakuruska mafuta;

⁴kweni pa umari waŵaŵa uli ndi fufuzi ya mu chimuti, wakuthwa uli ndi lipanga lakuthwa kuŵi viyo.

⁵Marundi ghake ghatuya ku nyifwa, michapu yake yindondoloska nthowa yakuya ku muunda,

⁶kuti watiyiphwere cha nthowa ya umoyo; nthowa zake ziyingayinga kweni iyo kuti waziŵa cha.

⁷Ndipo sono, mwaŵana mwe, tegherezgani kwangu, ndipo mungatuwangako cha ku mazu gha mlomo wangu.

⁸Sungani nthowa yinu kutali ndi iyo, ndipo mungayanga kufupi ku khomo la nyumba yake;

⁹vinu mungapaska ulemu winu ku ŵanyake ndi virimika vinu ku ŵambura lisungu;

¹⁰vinu ŵalendo ŵangaguta vya nthazi yinu, ndi nchitu zinu zingaya ku nyumba ya mlendo;

¹¹ndipo pa umari wa umoyo winu mudaghenge, penipo nyama yinu ndi luŵavu vikamaranga,

¹²ndipo mukakambanga, “Bama mo ndingutinkhiya kuvwiya, ndipo mtima wangu unguyeya kuchenjezga!

¹³Kuti ndingutegherezga ku mazu gha ŵasambizgi ŵangu cha pamwenga kuŵikako gutu ku wakundirunguchizga.

¹⁴Ine ndenga pa khomo la pharghaniku likuru, mu mpingu wakuwungana pamoza.”

¹⁵Mwaninga maji gha mu chisima chaku mwaŵene, maji ghakupopoma ghamu chisima chaku mwaŵene.

¹⁶Asani visima vinu vyakubwibwituka vingasapatiya kunyake, tumsinje twa maji mu miseu?

¹⁷Ghaŵe ghaku imwe mwija pe, kuŵa gha ŵalendo cha ŵeniwo ŵe pamoza namwe.

¹⁸Chiŵe chakutumbikika chisima chinu, ndipo kondwani ndi munthukazi wa unyamata winu,

¹⁹nyama yinthukazi yakunozga, kalulu wa manyanda. Mbonekera yake yikuzaze iwe nyengo zose ndi linkondwa, nyengo zose ukhorwe ndi chanju chake.

²⁰Chifukwa nchine, wa mwana wangu, chakukhorwe munthukazi muyaghayagha ndi kuvumbatiya chifuŵa cha wakunyenga?

²¹Pakuti nthowa za munthu ze paurongo pa maso gha Ambuya, ndipo iwo ŵateska nthowa zake zose.

²²Mphurupuru za muheni zitumuthya ndipo wawira mu kuchita kwa uheni wake.

²³Watufwa chifukwa chakuwulavi kuvwiya dangu, ndipo chifukwa cha kupusa kwake kukuru wasoŵa.