Read gitonga Nthanthi 7 Bible Online

Nthanthi 7 - gitonga bible

Nthanthi 7

¹Wa mwana wangu, sunganga mazu ghangu, ndi uŵike mbiku marangu ghangu mwako;

²sunganga marangu ndi ujenge wamoyo, sunganga kurunguchizga kwangu uli ndi mboni ya jisu lako;

³Uvimangiriyi pa minwi yako, uvilembe pa gome la mtima wako.

⁴Kamba ku zeru, “We muzichi wangu,” ndipo dana maghanaghano bwezi lako lakuziŵikwa,

⁵kukusunga iwe ku munthukazi muyaghayagha, ku munthukazi wakunyenga ndi mazu ghake gha uteremusi.

⁶Pakuti pawindo la nyumba yangu ndalereska kubwalo pakati pa tumiti,

⁷ndipo ndawona mukati mu ŵampupuka, munyamata wambura chinjeru,

⁸wadumuwa mu museu pafupi ndi chisongo chake, wachito museu waku nyumba yake

⁹maso fyepere ndi mazuluvi, pa nyengo ya usiku ndi mdima.

¹⁰Ndipo ehe, munthukazi wakumana nayo, wakuvwala uli ndi mureŵi wakuchenje mu mtima.

¹¹Wabangula ndi wanyenga, marundi ghake kuti ghaja pasi pa nyumba cha;

¹²sono we mu museu, sono we pa musika, ndipo pa chisongo che chose waŵeramiya.

¹³Watimuvumbitiya ndi kumufyofyontha, ndipo ndi chisku chakujirumba watiti kwaku iyo:

¹⁴“Ndaperekanga mipasku, ndipo msana wale ndalipa marapu ghangu;

¹⁵Viyo sono ndaziya kukumana nawe, kukupenja kwarwana, ndipo ndakusaniya.

¹⁶Ndayala chakujapo changu ndi vyakuvwinkhapo saru za maluŵa za thonje laku Egipiti:

¹⁷ndadapo vyakununkhira pa bedi langu vya muro, aloe ndi sinamoni.

¹⁸Zanga, tikakondwe mu chanju chidu mpaka mlenji; tiye tikondwereskeke taŵeni ndi chanju.

¹⁹Pakuti murumu wangu kuti wemu nyumba cha; waruta pa ulendo utali;

²⁰waruta ndi thumba la ndrama, wakawerenga ku nyumba uchikhoma mwezi.”

²¹Ndi kakambidu ka kuru kakuwoja watimuchichizga; ndi mazu ghake ghakufyafyaliska watimukakamizga.

²²Mbwenu ruŵi-ruŵi watimurondo, uli ndi ng'ombe yitiya kukubayika, pamwenga uli ndi nyama yakoleka kwakufyeka

²³mpaka penipo muvwi uporota mu matumbu ghake; uli nkhayuni kakuchimbiriya mu chiŵana; iyo kuti waziŵa cha kuti chibayenge umoyo wake.

²⁴Ndipo sono, mwaŵana ŵangu mwe, tegherezgani kwangu, ndipo pulikizgani ku mazu gha mlomo wangu.

²⁵Mtima ureke kupatukiya ku nthowa za munthukazi yo, mungalandiyanga mu miseu yake cha,

²⁶pakuti ŵanandi ŵakuthereskeka waŵabwanthuliya pasi; inya, ŵakubayika ŵake wose ndi mpingu wanthazi.

²⁷Nyumba yake ndi nthowa yakuya ku muunda, yakusere pasi ku vipinda vya nyifwa.