Read gitonga Wakutaula 4 Bible Online

Wakutaula 4 - gitonga bible

Wakutaula 4

¹Ndinguwona so visuzgu vyose vyo vichitika panu pasi. Ehe, masozi gha ŵakukandirizgika, ŵengavi nanga njumoza wakuŵasangaruska! Kuchiri ku ŵakuŵakandirizga kwenga mazaza, ndipo pengavi yumoza wakuŵasangaruska.

²Ndipo ndingughanaghana kuti mbamwaŵi ŵakufwa, wo ŵakufwa kale kuruska wo ŵeche ndi umoyo;

³kweni yo ngwamwaŵi kwakuruska yaŵa wose ndi mweniyo wandapapike, ndipo wandawone nchitu za ukazuzi zo zichitika panu pasi.

⁴Penipo ndinguwona kuti milimu yose ndi umisiri wose mu nchitu utuza kutuliya mu sanji ya munthu ndi mwanasi wake. Ichi nachu nchawaka ndi suzgu ya mtima.

⁵Wakupusa wapeta manja ghake, ndi kurgha nyama ya mweneko.

⁶Lamampha ndi janja limoza lo lazaza chisisi kwakuruska manja ghaŵi ghakuzaza suzgu ndi kukweŵeskeka kwa mtima.

⁷Ndipo so ndinguwona chawaka panu pasi:

⁸munthu yo walivi nanga njumoza, kaya mwana munthurumi pamwenga mbali, kweni uli kulivi umari ku suzgu yake yose, ndipo maso ghake kuti ghaguta ndi usambasi cha, viyo kuti watijifumba cha kuti, “Kumbi ine ndisuzgikiya yani pakujikanizga ku malikondwa?” Ichi nacho so nchawaka ndipo ndi nchitu yambura kukondweska.

⁹Kuŵa ŵaŵi nkhwamampha kwakuruska yumoza, chifukwa mu kutakataka kwawo ŵendi mphoto yamampha.

¹⁰Pakuti asani ŵaŵa ŵaŵi yumoza wakayuskanga munyake; kweni owe kwaku yo we yija asani wawa walivi munyake wakumuyuska.

¹¹Ndipo so, asani ŵaŵi ŵagona pamoza, ŵafundiskana; kweni kumbi yumoza wangajifundiska uli?

¹²Nanga yumoza wangmuruska munyake pakumikana nayo, kweni ŵaŵi ŵakamuruskanga, chingwe cha mitegha yitatu kuti chidumuka ruŵi cha.

¹³Ngwamampha munyamata mukavu ndi wazeru kwakuruska karonga mura ndi muzereza, mweniyo kuti wangaronde chenjezgu cha,

¹⁴inya nanga wangutuliya mu nyumba ya ukayidi kwazifika pa chitengu cha ufumu pamwenga wanguwiya mu ukavu mu ukavu mu ufumu wake.

¹⁵Ndinguwona ŵamoyo wose ŵakwenda panu pasi, nge ndi munyamata yuwa, mweniyo wamanga mu malo ghake,

¹⁶kwengavi umari ku ŵanthu wose; wenga pachanya paku iwo wose. Ndipo wo ŵatuza pavuli pake kuti ŵakakondwanga mwaku iyo cha. Kwakuneneska ichi nachu so nchawaka ndi suzgu ya mtima.