Read gitonga Wakutaula 8 Bible Online

Wakutaula 8 - gitonga bible

Wakutaula 8

¹Ndiyani yo wayana ndi munthu wazeru? Ndipo ndiyani yo waziŵa kung'anamulidu ka chinthu? Zeru za munthu zingweruska chisku chake, Ndipo unonono wa chisku chake usinthika.

²Sunga langulu la karonga, ndipo chifukwa cha rapu lako lakupaturika reka kugongowa;

³tuwapo pa maso pake, reka kuswera penipo makani ngambura kukondweska, pakuti wachita chose chose chitimkondweska.

⁴Pakuti mazu gha karonga nga nthazi, ndipo ndiyani yo wanganena kwaku iyo, “Uchitanji?”

⁵Mweniyo wavwiya langulu kuti wakumanenge ndi kakupweteka cha, ndipo mtima wa munthu wazeru ukaziŵanga nyengo ndi nthowa.

⁶Pakuti kanthu kose kendi nyengo yake ndi nthowa yake nanga suzgu yamunyekezga weniukongwa munthu.

⁷Chifukwa kuti waziŵa cha cho chikaŵangako, pakuti ndiyani yo wangaziŵa kumunene mo chikaŵiyanga?

⁸Kulivi munthu yo wendi nthazi, pamwenga mazaza ghakuko mzimu pa zuŵa la kufwiya; kulivi kufwatuka ku nkhondo, nanga mbuheni kuti ukapozomoskanga iwo ŵakujipereka kwaku wo cha.

⁹Chose ichi ndinguchisanda po mtima wangu wapenjanga mwaku vyose vyo vichitika panu pasi, penipo munthu wapweteka munthu munyake pakumuwusa.

¹⁰Sono ndinguwona ŵaheni ŵaŵikika mu masono; iwo ŵaserenga ndi kutuwa mu malo ghakupaturika, ndipo ŵarumbikanga mu muzi mwenimo ŵachitanga vya viyo. Ichi nachu so nchawaka.

¹¹Chifukwa cheruzgu chapa nchitu yiheni kuti chifiskika ruŵi cha, mtima wa ŵana ŵa ŵanthu ukuzikitizgikiya limu kuchita uheni.

¹²Nanga mulakwi wachita uheni unandi limu ndi kuŵa ndi umoyo utali, ndipuuli ndiziŵa kuti ŵakopa Chiuta kukaŵaŵiyanga umampha, chifukwa ŵatopa pa maso pake;

¹³kweni muheni kuti kumuŵiyenge umampha cha, nanga nkhuti mazuŵa ghake gharutiliye nge nchiduduzi chake, chifukwa kuti watopa paurongo paku Chiuta cha.

¹⁴Kwe chawaka cho chichitika panu pasi, kuti ŵalipo ŵanthu ŵarunji paku ŵeniwo chituŵawiya kwakuyana ndi nchitu za ŵaheni, ndipo ŵalipo ŵaheni paku ŵeniwo chituŵawiya kwakuyana ndi nchitu za ŵarunji. Ndinguti ichi nachu so nchawaka.

¹⁵Ndipo ndingurumba kukondwa, pakuti munthu walivi kamampha panu pasi kweni kurgha ndi kumwa, ndi kujikondweska mweneko, pakuti ichi chikaŵanga nayo mu nchitu yake mazuŵa ghose gha umoyo wake gho Chiuta watumpaska panu pasi.

¹⁶Po ndinguti ndapereka mtima wangu kuziŵa vinjeru, ndi kuwona nchitu zo zichitika panu pasi, chifukwa chine kuti chingana ndi msana pamwenga usiku maso gha munthu kuti ghawona tulo cha;

¹⁷penipo ndinguwona nchitu zose zaku Chiuta munthu kuti wangasaniya nchitu yo yichitika panu pasi cha. Nanga wangafukafuka uli mu kupenja-penja kuti wangayisaniya cha; manyi chingana ngwazeru yo watiti waziŵa, kweni kuti wangayisaniya cha.