Read gitonga Sumu ya Zisumu 1 Bible Online

Sumu ya Zisumu 1 - gitonga bible

Sumu ya Zisumu 1

¹Sumu ya zisumu yo njaku Solomoni.

²Owe mphanyi ungundifyofyontha ndi mifyofyontho ya mlomo wako! Pakuti kwanja kwako nkhwamampha kuruska vinyo,

³mafuta ghako ghakupaka nga chema, zina lako ndi mafuta ghakupungulika; mu chifukwa cho ŵamwali ŵatukwanja.

⁴Ndiguziye kuvuli kwako, tiye titinthimike. Karonga wanditore mu vipinda vyake. Tikondwenge ndi kusekere mwaku iwe; tikarumbanga chanju chako kwakuruska vinyo; ŵatukwanja umamphavi.

⁵Nde mufipa ukongwa, kweni wakutowa, mwaŵana ŵanthukazi ŵaku Yerusalemu, nge ndi mahema ghaku Kedara, nge ndi saru zakuchinga zaku Solomoni.

⁶Rekani kulereska paku ine, chifukwa nde mufipa, chifukwa lumwi landiŵawuwa. Ŵana ŵanthurumi ŵa ama ŵangundikaripiya, ŵangundichita kuŵa wakusunga munda wa mphereska; kweni munda waku ndamweni wa mphereska kuti ndawusunga cha!

⁷Ndikambiye iwe, wamweniwe mzimu wangu utanja, kweniko uliska muskambu wako, pakuti kumbi ndikaŵiyanganji nge njumoza wa ŵayinga, pafupi ndi miskambu ya ŵanyako?

⁸Asani ureka kuziŵa, wakutowa iwe mu ŵanthukazi, rondo mu marundi gha muskambu, ndipo liskanga twana twako twa mbuzi pafupi ndi mahema gha ŵaliska.

⁹Wakwanjiwa wangu nditukulinganizga iwe, ku kavalo munthukazi wa magareta ghaku Farao.

¹⁰Matakama ghako ngakutowa ndi vitowelo, khosi lako ndi mapheska gha vyakugadima.

¹¹Tikakuchitiyanga vitowelo vya golide, vyakumatirika ndi siliva.

¹²Penipo karonga wanguja pa chita chake, mafuta ghangu ghangutuzga fungu lake.

¹³Wakwanjiwa wangu kwaku ine ndi thumba la muro, lo ligona pakati pa maŵe ghangu.

¹⁴Nkhwanjiwa wangu kwaku ine ndi nchinda ya maluŵa ghayera mu munda wa mphereska waku Engedi.

¹⁵Ehe, we wakutowa, wakwanjiwa wangu; awona, we wakutowa; maso ghako ghenge nga nkhunda.

¹⁶Ehe, we wakutowa, wakwanjiwa wangu, nadi wakwanjiwiska. Chita chidu nchakubiriŵira;

¹⁷migolo ya nyumba yidu nja sidara, mapaso ghidu nga milanje.