Read gitonga Sumu ya Zisumu 2 Bible Online

Sumu ya Zisumu 2 - gitonga bible

Sumu ya Zisumu 2

¹Ndine luŵa liyera laku Sharoni, luŵa lakunozga la mu madambo.

²Nge ndi luŵa lakuŵara mukati mu minga, viyo ndimu walili nkhwanjiwa wangu mukati mu ŵamwali.

³Nge ndi muti wa mbuwa mukati mu miti ya mu lisuwa, ndimu walili nkhwanjiwa wangu mukati mu ŵanyamata. Ndi likondwa la kuruska ndinguja pasi mu mduzi wake, ndipo vipasi vyake vingukondakonda mu mlomo wangu.

⁴Wangunditore ku nyumba ya madghera, ndipo mbendera yake pachanya pangu yenga chanju.

⁵Mundikhozge ndi mphereska za kumila, ndisangaruskeni ndi vipasi vya mbuwa; pakuti ndatama ndi chanju.

⁶Owe mphanyi janja lake la maze lenga kusi ku mutu wangu, mphanyi janja lake la marghe lingundifukatiya!

⁷Ndikurapiskiyani, mwaŵana ŵanthukazi ŵaku Yerusalemu, pa mphoyo pamwenga mphalaza mdondo, kuti mureke kusukung'a nanga nkhuyuska chanju mpaka penipo chakhumba.

⁸Mazu gha wakwanjiwa wangu! Ehe, watuza, wawuluka-wuluka pa mapiri, wajitika pachanya pa mitunthu.

⁹Nkhwanjiwa wangu walingana ndi mphoyo, pamwenga mwana wa mbaŵa. Awonani, ndi yuwa wama kuwa kurweka kwa linga lidu, walereska mukati pa madangazi, walingizga mu tumphuwu tufinyi.

¹⁰Nkhwanjiwa wangu warongoro watiti kwaku ine: “Yuka, chanju changu, wakutowa wangu, tiye;

¹¹pakuti ehe, chifuku chajumpha, vuwa yamara yaruta.

¹²Maluŵa ghawoneka pa charu, nyengo ya kumba yafika, kumba kwa njiŵa kuvwika mu charu chidu.

¹³Muti wa mkuyu urongo nkhuyu zake, ndipo mphereska nazo zituzga maluŵa; zipereka fungu lamampha. Yuka, nkhwanjiwa wangu, wakutowa wangu, tiye.

¹⁴Owe nkhunda yangu, mu vinkhwawu vya jarawi, mu mazenje ghakubisika, mphanyi ndawona chisku chako, ndivwi mazu ghako, pakuti mazu ghako ngakunowa, ndipo chisku chako nchakunozga.

¹⁵Tikoliyeni ŵakambwe, ŵakambwe ŵamanaŵamana, wo ŵananga minda ya mphereska, pakuti minda yidu ya mphereska ye ndi maluŵa.”

¹⁶Nkhwanjiwa wangu ngwaku ine, ndipo ine nde wake, waliska muskambo wake mukati mu maluŵa ghakuŵala.

¹⁷Mpaka penipo lumwi latuwa ndi miduzi yathaŵa, weko, nkhwanjiwa wangu, uŵi nge ndi mphoyo, pamwenga mbaŵa yinthurumi mu vinkhwawu vya mapiri.