Read gitonga Sumu ya Zisumu 6 Bible Online

Sumu ya Zisumu 6 - gitonga bible

Sumu ya Zisumu 6

¹Nkhwanjiwa wako waya pani, wakutowa mukati mu ŵanthukazi? Nkhwanjiwa wako wapatukiya kuchiri nukhu mwakuti timpenje pamoza nawe?

²Wakwanjiwa wangu wasikiya ku munda wake, ku migandu ya vyakununkhira, kuliska muskambu wake mu minda, ndi kuwunjika maluŵa ghakuŵala.

³Inde nde wake wa nkhwaniwa wangu, ndipo nkhwanjiwa wangu ngwangu; waliska muskambu wake mukati mu maluŵa ghakutowa.

⁴Nkhwanjiwa wangu ukutowa nge ndi Tiriza, ukutowa nge ndi Yerusalemu, wakofya nge ndi liŵanja la nkhondo ndi ndembera.

⁵Ng'amamuskiya maso ghako kunyake kutuwa kwaku ine, pakuti ghatinditimbanizga. Sisi lako liyana ndi muskambu wa mbuzi, wakusika pa vinkhwawo vya Gileada.

⁶Minyu ghako ghe nge ndi muskambu wa mberere zinthukazi, zenizo zaweko kukusamba, zose zendi ŵana ŵamuwoli, ndipo palivi yumoza mukuti mwaku zo, yo ndi chumba.

⁷Nge ndi vidumuka vya zobala ndimo ghaliri matakama ghako msina mwa velu wako.

⁸Ghaliko mafumukazi machumi ghankhonde ndi limoza (60), ndi mbiligha machumi ghankhonde ndi ghatatu (80), ndipo ŵamwali mbambura maŵerengeka.

⁹Nkhunda yangu, murungi wangu, njumoza pe mbwenu, wapa mtima ku anyina, ngwakusankhika waku mweniyo wakumupapa. Ŵamwali ŵangumuwona ndipo ŵangumudana kukondwa; mafumukazi, pamoza ndi mbiligha viyo, ŵangumukuzga ukongwa.

¹⁰“Ndiyani uyu yo wawoneka kutuwa ulaka nge ndi matandakucha, wakutowa nge ndi mwezi, wakuŵala nge ndi lumwi, wakofya nge ndi liŵanja la nkhondo ndi ndembera?”

¹¹Ndingusikiya ku munda wa mbalala, kwachiwona vipasi vyamu dambo, kwachilereska vinu mphereska zikwamba kupasa, vinu ŵazobala ŵayamba kuchita maluŵa.

¹²Ndenga ndi ndapanikizge, umoyo wangu ungundijarika mu gareta, pafupi ndi fumu yangu.

¹³Owe Shulama we, weko, weko, weko, weko, mwakuti tikuwoni. Kumbi makamuwoniyanganji mu Shulama, ulaka mpha masoŵero gha paurongo pa maliŵanjaghaŵi gha nkhondo?