Read gitonga Sumu ya Zisumu 8 Bible Online

Sumu ya Zisumu 8 - gitonga bible

Sumu ya Zisumu 8

¹Owe mphanyi unguŵa nge ndi mbali kwangu, yo wakonkha ku maŵe gha ama! Asani ndingukumana nawe kubwalo, mphanyi ndakufyo fyontha, ndipo kwatinge kuŵengevei wakundinyoza.

²Ndatinge ndikurongozgenge kuza nawe mu nyumba ya ama, mu chipinda chaku mweniyo wangundibala ine. Ndatinge ndikupaskenge vinyo wakununkhira kuti umwe, maji gha zobala wangu.

³Janja lake la maze mphanyi linguŵa pasi pa mutu wangu, kundifukatiya ndi janja lake la marghe.

⁴Mwa ŵana ŵanthukazi ŵaku Yerusalemu, ndikurapiskiyani, kuti mureke kusukung'a nanga nkhuyuska chanju, mpaka penipo chakhumba.

⁵Ndiyani yuwa watuza kutiliya ku bozwa, wayegeme pa wakwanjiwa wake? Ndingukuyuska iwe musina mu muti wa muŵaŵa. Kwenikuwa anyoko ŵenga musuzgu chifukwa chako, kwenikuwa ndiko wakukubala iwe wenga musuzgu.

⁶Undiŵike nge nchizighiriyi pa mlima wako, nge nchizighiriyi pa janja lako, pakuti chanju nchamunthazi nge ndi nyifwa, sanji njikali nge ndi muunda. Kung'anima kwake nkhung'anima kwa moto, wakuŵa ndi dangalira la kofya.

⁷Maji ghanandi kuti ghangaziŵa kuzimwa chanju cha, nanga ndi misinji yakuzaza kuti yingachifufurwiska cha. Asani munthu wangupereka usambasi wose wamu nyumba, yake chifukwa cha chanju, watinge wupereŵenge mbwenu.

⁸Tenayo mzichi widu mumana, walivi maŵe. Tikamuchitiyanganji mzichi widu, pa zuŵa lo kwamukambikiya vya paku iyo?

⁹Asani ndi chiliŵa, tikazenganga paku iyo chitanthali chikuru cha siliva; kweni asani ndi khomo tikamujaranga ndi mathabwa gha milanje.

¹⁰Ine ndenga chiliŵa, ndipo maŵe ghangu ghenga nge ndi vitanthali; viyo ndinguŵa mu maso ghake ulaka nge njumoza yo wapinga chimangu.

¹¹Solomoni wenga ndi munda wa mphereska pa Balahamoni; wanguwupereka munda wa mphereska ku ŵakuwusunga; pa chifukwa cha vipasi vyake munthu yose wazanga ndi ndrama za masiliva chikwi (1,000).

¹²Munda wangu wa mphereska, weniwo pe wangu, ngwaku ndamweni; A, Solomoni, iwe uŵenge ndi chikwi (1,000), ndi ŵakusunga vipasi machumi pe chumi ghaŵi (200).

¹³Ehe iwe wakuja mu minda, ŵapamoza nane ŵategherezga ku mazu ghako; mphanyi nane ndaghavwa.

¹⁴Tinthimika, wakwanjiwa wangu, uŵe ulaka nge ndi mphoyo pamwenga mwana wa mbaŵa pa mapiri gha vyakununkhira.