Read gitonga Yesaya 13 Bible Online

Yesaya 13 - gitonga bible

Yesaya 13

¹Uchimi wa paku Babiloni wo Yesaya mwana waku Amozi wangu wona.

²Kwezgani mbendera pa phiri la mtetete, bongoni ukongwa kwaku iwo, muŵacheuliye janja kuti ŵasere pa malikomo gha ŵakuzirwa.

³Ine ndamweni ndalanguliya ŵakupaturika ŵangu, ndadana ŵanthazi kuti ŵafiske ukari wangu, ŵakutumbwa ndi ŵakujikuzga ŵangu.

⁴Avwani, chiwawa pa mapiri, uli ncha chimpingu chikuru! Avwani, chimtimbaheka cha maufumu, cha mitundu yakuunjikana pamoza! Ambuya ŵa maŵanja aungang'a liŵanja la nkhondo.

⁵Watuwa ku charu cha kutali, ku umari wa machanya, Ambuya ndi vidya ukari wawo, kuchiparghang'a charu chose chapasi.

⁶Liyani, pakuti zuŵa la Ambuya laŵandika, likazanga nge ndi phasulu la kutuwa ku Wanthazizose!

⁷Viyo manja ghose ghakakwinyatanga, mtima wa munthu yose ukasongonokanga,

⁸ndipo ŵakazizwanga. Kulasa ndi urwirwi vikaŵakonga, ŵakaŵanga mu suzgu ulaka ndi munthukazi wakupapa. Ŵakawonekanga nge mbazereza pakulereskana; visku vyawo vikalipukanga ndi moto.

⁹Ehe, zuŵa la Ambuya lituza, likari, la kuŵaŵa ndi kukaripa kwakofya, kuzachichita charu chapasi mapopa, kunanga ŵaheni ŵake kuŵatuzgamo.

¹⁰Pakuti nyenyezi za machanya ndi mawumba ghake kuti vikapaskanga ukweru wawo cha lumwi likafipanga pakutuwa kwake mwezi kuti ukalongonga kuŵara cha.

¹¹Ndikalanganga charu chifukwa cha uheni wake, ŵaheni chifukwa cha utimbanizi wawo, ndikagoteskanga kujikuzga kwa ŵakujitukumuwa, ndikusiskiya pasi kujikuzga kwa ŵambura lisungu.

¹²Ndikaŵachitanga ŵanthu kuŵa ŵauliwuli kwakuruska golide lamampha, ndi unthu wa ŵanthu kwakuruska golide la Ofiri.

¹³Chifukwa cho ndikanjenjemeskanga machanya, ndipo charu chapasi chikasukuniskikanga kutuwa mu malo ghake, pa ukari wa Ambuya ŵa maŵanja mu zuŵa la ukari wawo wakofya.

¹⁴Ndipo uli ndi mbaŵa yakuŵingika, pamwenga mberere zo silivi wakuziungang'a pamoza, munthu yose wakawerenga ku ŵanthu ŵake, ndipo munthu yose wakathaŵiyanga ku charu chake.

¹⁵We yose wakusanirika wakalasikanga, ndipo yose wakukoreka wakawanga ndi lipanga.

¹⁶Malitema ghawo ghakasirikanga tumanatumana pa maso pawo, nyumba zawo zikakwamphulikanga ŵawoli ŵawo ŵakayorekanga.

¹⁷Ehe, ndiyuska mitima ya ŵaMede, ŵeniwo kuti ŵaphwereko ndi siliva cha, ndipo ŵalivi likondwa mu golide.

¹⁸Mauta ghawo ghakabayanga ŵanyamata; ŵaulengevi lisungu ndi chipasi cha chibali, maso ghawo kuti ghakafwiyanga lisungu ŵana cha.

¹⁹Ndipo Babiloni, yo mbunkhankhu wa maufumu, unozgi ndi kujikuzga kwa ŵaKaldiya, wakaŵanga nge ndi Sodomu ndi Gomora po Chiuta wanguyibwanganduwa.

²⁰Kuti ŵakajangamo so cha ŵanthu pamwenga kujamo mu migonezi yose, paulengevi mu Nasara wakumika hema lake muwa, paulengevi mliska wakuutiska viŵetu vyake muwa.

²¹Kweni nyama za mudondo ndizo zikalanga mo, nyumba zake zikazazikanga ndi vikoko vyakukoroma, muwa ndimu mukajanga viyuni vya makuŵi, ŵangoza ŵawo ŵakavinanga mwenimuwa.

²²Ŵapundu ŵakahumanga mu ŵasonjo ŵake, ŵakambwe mu nyumba zake, zakukondweska za chifumu; nyengo yake yaŵandika ye pafupi ndipo mazuŵa ghake kuti ghakarutiriyanga cha.